Kreu i Prokurorisë së Posaçme, Altin Dumani, gjatë një aktiviteti të organizuar nga Komiteti Shqiptar i Helsinkit mbi luftën kundër korrupsionit, ka hedhur dyshime mbi magjistratët e konfirmuar në detyrë nga vetingu.
Gjatë fjalës së tij, Dumani theksoi se shqetësimi më i madh për SPAK janë të konfirmuarit në detyrë dhe jo të shkarkuarit. Sipas kreut të SPAK, gjyqtarët dhe prokurorët që kanë kaluar vetingun janë në sistem dhe ka indicie dhe premisa se kryejnë akte korruptive
“Materialet nga procesi administrativ i vetingut i kemi përdorur si indicie për të gjetur prova në hetimin penal. Rezultatet e hetimit administrativ janë një bazë e mirë për të gjetur prova ndaj subjekteve të shkarkuar nga vetingu. Ne nuk kemi qenë të verbër ndaj vendimeve të organeve të vetingut. Kemi regjistruar hetime kryesisht për veprat penale të korrupsionit dhe jemi të kujdesshëm në filtrimin e vendimeve të vetingut. Në rast se nga vetë përmbajtja e vendimit, krijohen indicie për vepër korrupsioni, ne kemi regjistruar procedim për veprën penale. Në rastet e korrupsioni kemi përdorur të gjithë llojet e përgjimeve apo llojet e tjera të kërkimit të provës.
SPAK ka marrë në ndjekje penale gjyqtarë të Kushtetueses, të Gjykatës se Lartë, të KPA, prokurorë të juridiksionit të përgjithshëm, apo oficerë të policisë gjyqësore. Do vazhdojmë ta bëjmë sa herë kemi indicie. E kam thënë dhe një herë tjetër, shqetësimi më i madh për SPAK nuk janë subjektet e shkarkuara, por ata që kanë kaluar këtë proces dhe vijojnë të ushtrojnë funksionin.
Problem është që janë në sistem dhe kanë premisa për të kryer veprime korruptive. Kemi detyrë të ushtrojmë ndjekjen penale. Secili institucion të përmbushë detyrimet e veta. I bëj thirrje qytetarëve të denoncojnë çdo akt korruptiv të gjyqtarëve apo prokurorëve. Institucionet përgjegjëse në luftën kundër korrupsionit duhet të jenë aktive dhe të furnizojnë SPAK me informacion.”, tha Dumani.
