Superiorja ditën e djeshme mbylli ndeshjet e javës së 14-të të saj dhe tashmë ekipet nuk kanë shumë kohë për të humbur, pasi sfidat e ardhshme janë “prapa dere”. Kështu java e 15-të e kampionatit do të luhet në 3 ditë.
Të premten do të luhet sfida e vetme mes Bylisit dhe Vllaznisë. Duel që do të zhvillohet në “Adush Muça” në orën 13:30.
Ndërkohë ditën e shtunë do të luhen 3 ndeshje. Gjithçka do të nisë me duelin mes Egnatias dhe Elbasanin që do të luhet në “Egnatia Arena” në orën 13:30.
Paralelisht do të luhet edhe në Kurbin. Laçi do të presë Skënderbeun për të bërë mes tyre llogaritë për këtë takim.
Po të shtunën do të luhet edhe takimi mes Dinamos dhe Teutës. Përballje që starton në orën 16:30 dhe zhvillohet në “Elbasan Arena”.
Ndërkohë dita e hënë është e gjitha në favor të derbit të kryeqytetit. Tirana dhe Partizanin do të përplasin “brirët” mes tyre për herë të dytë në këtë sezon, përballje që është parashikuar të startojë në orën 19:00.
Një lajm i mirë për të gjithë është se Tiranës i janë rikthyer tifozët dhe do të jenë të pranishëm në derbi. Tirana apeloi vendimin e marrë disa javë më parë nga Disiplina pas incidenteve pas Vllaznisë, ku bardheblutë u dënuan që të zhvillonin të gjithë sezonin pa spektatorë.
Përveç gjobës që ka mbetur e pandryshuar, Apeli ka vendosur të konvertojë dënimin në 8 ndeshje pa tifozë, por ndërkohë e ka pezulluar atë pas 3 ndeshjeve me kushtin që nëse përsëritet do rikthehet masa drastike.
