Asambleja Politike e Partisë Popullore Europiane (EPP) ka miratuar këtë të premte një Rezolutë, ku shpreh shqetësimet e saj lidhur me gjendjen aktuale politike në Shqipëri në prag të zgjedhjeve parlamentare të vitit 2025.
Si përfaqësues të Partisë Demokratike në Asamblenë e PPE-së kanë qenë dy deputetët Albana Vokshi dhe Oerd Bylykbashi. Vokshi ka reaguar përmes një postimi në rrjetet sociale pas miratimit të kësaj rezolute, ku shprehet se në vendin tonë po ndodh një përkeqësim i rëndë i demokracisë, lidhur me abuzimet e pushtetit dhe arrestimet e krerëve të opozitës.
Deputetja demokrate shprehet se BE dhe PPE duhet të marrin qëndrim energjik për të garantuar zgjedhje të lira dhe të ndershme.
Postimi i plotë:
Sot me Oerdin në Asamblenë Politike të PPE-së:
Në Shqipëri po ndodh një përkeqësim i rëndë i demokracisë. Opozita përballet me arrestime politike, përdorim të prokurorisë dhe gjykatave si armë kundër saj, dhe frikësim të votuesve. Kryeministri Rama abuzon me pushtetin shtetëror dhe ndërkombëtar për të ndikuar zgjedhjet. Shpërdorimi i pushtetit dhe bashkëpunimi me krimin e organizuar minojnë sundimin e ligjit.
BE dhe PPE duhet të marrin qëndrim energjik për të garantuar zgjedhje të lira dhe të ndershme. Rezoluta e propozuar kërkon vëmendjen dhe mbështetjen tuaj për të dërguar një mesazh të fortë në Shqipëri dhe më gjerë.
