Presidenti i Partisë së Lirisë, Ilir Meta, i është drejtuar me një letër publike anëtarëve, simpatizantëve dhe Kryesisë të Partisë së Lirisë.
Në letrën e lexuar nga Sekretari i Përgjithshëm i PL-së, Tedi Blushi, Meta iu kërkon mbështetësve që të nisin protestat para SPAK-ut. Sipas Metës, protestat duhet të zhvillohen për të denoncuar ato që ai i quan manipulime skandaloze të Prokurorisë së Posaçme në dosjen kundër tij si dhe për të denoncuar aferat e kryeministrit Edi Rama për të cilat thotë se SPAK nuk po i heton.
“Të nisin protestat paqësore periodike para SPAK për të denoncuar të gjitha manipulimet skandaloze të tyre në dosjen kundër meje dhe për të denoncuar aferat skandaloze të Edi Ramës që SPAK nuk i heton”, thuhet ndër të tjera në letrën e Metës dërguar PL-së.
Në mesazhin e tij, Meta artikulon akuza të forta ndaj Arben Krajës, një prej prokurorëve që po heton ish-Presidentin, duke e cilësuar një prokuror të pafytyrë që dënonte të rinjtë në prag të viteve ’90, vetëm se ishte kundër regjimit të diktaturës.
Letra vjen një ditë pasi Apeli i GJKKO-së vendosi ta lërë në burg Ilir Metën, i cili u arrestua më 21 tetor, nën dyshimet për disa vepra penale, “korrupsion” në 3 raste, “pastrim parash” dhe “fshehje të pasurisë”.
