Avokati dhe aktivisti Elton Laska ka reaguar në lidhje me vrasjen e 14-vjeçarit Martin Cani në afërsi të shkollës ‘Fan Noli’ në Tiranë.
Laska shkruan në Facebook se fajtori i vërtetë i kësaj tragjedie nuk është i mituri që kreu krimin, por strukturat organizative, të cilat nuk ofrojnë sigurinë e duhur nëpër shkolla. Sipas tij, neglizhenca e oficerit të sigurisë, çoi në këtë tragjedi.
Më tej avokati thekson se ky akt kriminal i jep edhe një arsye më shumë emigrantëve për të qëndruar atje ku janë dhe banorëve të këtij vendi një arsye më shumë për të ikur e për të mos e kthyer më kokën pas.
Postimi:
Ngushëllime të sinqerta familjes Cani për këtë humbje kaq të madhe. Zoti ju dhëntë forcë për ta përballuar!
Sot, më shumë se kurrë, ndihem i frikësuar për të çuar fëmijët e mi në shkollë. Gjithkush flet për ngjarjen, por askush nuk flet për fajtorin. Fajtori i vërtetë i kësaj tragjedie nuk është i mituri që kreu krimin, por strukturat organizative, të cilat nuk ofrojnë sigurinë e duhur nëpër shkolla. Neglizhenca e oficerit të sigurisë, me moton: “Hë mo, se fëmijë janë,” çoi në këtë tragjedi kaq të rëndë.
Martin Cani, sot duhet të ishte duke luajtur futboll me bashkëmoshatarët apo shokët e ekipit, por fatkeqësisht në këto momente, trupi i tij i pajetë po vajtohet nga sytë me lot dhe zemrat e gjakosura të prindërve të tij.
Ky akt kriminal i jep edhe një arsye më shumë emigrantëve për të qëndruar atje ku janë dhe banorëve të këtij vendi një arsye më shumë për të ikur e për të mos e kthyer më kokën pas.
Po të njëjtën peshë faji mban edhe shoqëria e këtij vendi: mungesa e komunikimit prind-fëmijë, mësues-prind, dhe ekspozimi i vazhdueshëm, sidomos në rrjetet sociale, i bandave kriminale.
Kam një thirrje për Ministrinë e Arsimit: Boll me propaganda, duke shpenzuar energji në burokraci e duke e shfrytëzuar trupën arsimore si vegël elektorale. Po shkatërroni të ardhmen e këtij kombi.
