Prokuroria e Posaçme ka dalë me një komunikatë zyrtare në lidhje me hetimet e kryera tek institucioni i Entit Kombëtar të Banesave, ku ka proceduar penalisht 8 persona persona, të cilat sipas SPAK, premtonin dhënien e banesave sociale kundrejt shumave monetare, në qytetin e Durrësit.
Bëhet fjalë për shtetasit: Gëzim Sylaj, Vasil Karasaliu, Viola Mema, Behare Luzi, Enxhi Çelaj, ndaj të cilëve është caktuar masa e sigurisë “Arrest me burg” nga GJKKO, si dhe për shtetasit Gazmend Panxha, Shyqyri Dema dhe Sokol Sylaj, ndaj të cilëve është caktuar masa e sigurisë “Detyrim paraqitje”.
Ndaj shtetasve të mësipërm rëndon akuza për veprën penale “Ushtrimi i ndikimit të paligjshëm ndaj personave që ushtrojnë funksione publike”, kryer në bashkëpunim dhe më tepër se një herë.
Raportohet se Policia e Shtetit ka ekzekutuar masat e sigurisë vetëm për 6 prej tyre, më konkretisht shtetasit Gëzim Sylaj, Vasil Karasaliu, Behare Luzi, Enxhi Çelaj, Gazmend Panxha, Sokol Sylaj.
Ndërsa, Viola Mema dhe Shyqyri Dema rezulton se prej disa kohësh janë larguar jashtë shtetit dhe ata janë shpallur në kërkim.
SPAK bën me dije se 5 prej tyre kishin ngritur një skemë përfitimi të paligjshme duke u prezantuar si punonjës me funksione drejtuese dhe vendimarrëse në dhënien e disa banesave sociale që ndodheshin në zonën e Spitallës në Durrës kundrejt përfitimit të shumës prej 15 mijë eurosh, e cila do të shërbente për bllokimin e banesës dhe dhënies së “kafeve” ndaj të tretëve. Ndërsa 3 të tjerë si persona që kanë dhënë shumat monetare, me qëllim përfitimin e banesave sociale.
Prokurorie Posaçme raporton se kjo çështje është rregjistruar më 6 nëntor 2024, përbri procedimit penal nr.11, të vitit 2023, i cili nisi mbështetur mbi informacionin e prezantuar në emisionin “Fiks Fare”.
Skema e mashtrimit:
Skema është ngritur nga pesë personat në hetim: Gëzim Sylaj, Vasil Karasaliu, Viola Mema, Behare Luzi dhe Enxhi Çelaj, të cilët, prezantoheshin si punonjës me funksione drejtuese në administratën shtetërore (drejtorë në Drejtorinë e Përgjithshme).
Personat e interesuar për banesa sociale, veç pagesës paraprake, do t’u dorëzonin të hetuarve dokumentacionin për procedurat standarde për përfitimin e banesës sociale. Më pas, personave të interesuar do t’u dërgohej një SMS konfirmimi nga ana e Bashkisë Durrës, periudhë kur sipas tyre do bëhej shpallja e fituesve ndërsa hyrja në banesë do të bëhej pas disa muajsh.
Nga tërësia e veprimeve hetimore ekzistojnë dyshime të arsyeshme të bazuara në prova se; personat nën hetim, në bashkëpunim mes tyre, në 4 episode të ndryshëm kanë kërkuar dhe marrë përfitimin e parregullt të shumave monetare që variojnë nga 5 000 (pesë mijë) deri në 10 000 (dhjetë mijë) euro dhe si persona me funksione publike kanë ushtruar ndikimin e tyre të paligjshëm, për të mundësuar përfitimin e një banese sociale në Durrës.
Të hetuarit u dërgonin subjekteve të interesuar një SMS, përmes numrit të tyre të telefonit celular:
“Pershendetje, Z./Znj…. Ju njoftojm se fazen e par te fitueses, per banes sociale..e keni kaluar me sukses .Do njoftoheni per cdo gje ne vazhdimesi-Me rrespekt nga bashkia-DURRES”.
Gjithashtu bëhet me dijes se SPAK i ka kërkuar GJKKO edhe kryerjen e disa kontrolleve, kërkesa të cilat janë miratuar nga ana e gjykatës, dhe nga policia gjyqësore janë ekzekutuar 8 (tetë) vendimet e gjykatës, si dhe janë realizuar kontrolle (banesash, automjetesh, dhe personash).
Pas kontrolleve të ushtruara janë sekuestruar sendet e mëposhtme:
- 2(dy) automjete BMË X6, dhe Volksëagen Passat.
- 7(shtatë) aparate telefonash celularë.
- 1(një) armë e dyshuar pistoletë sportive, me ngjyrë të zezë, me mbishkrim Col 9 mm A.K dhe “Bloë Magnum”, me krehër dhe 24 fishekë manovër.
- Dokumente të ndryshme.
SPAK bën me dije se hetimet rreth këtij procedimi penal vazhdojnë me administrimin e provave të tjera për sqarimin e plotë të rrethanave të kësaj ngjarjeje.
