“One Albania” po ua “nxin jetën” shqiptarëve të cilët paguajnë por nuk marrin asnjë lloj shërbim nga kjo kompani telekomunikacioni e cila përfshihet nga skandali në skandal.
Së fundmi bie faqja online e “One Albania” e cila është një kompani që reklamon shërbim të sigurt për klientët por në realitet nuk janë të aftë për të mbajtur as faqen e tyre online.
Nuk dihet nëse kemi të bëjmë me një sulm kibernetik apo host të papaguar, por ajo që është e sigurt është fakti që mijëra abonentë të kësaj kompanie telefonike nuk marrin dot shërbimin e nevojshëm.
Për këtë ngjarje gjithashtu ka reaguar edhe eksperti i IT, Gentian Progni i cili ironizon konferencat e zhvilluar nga “One Albania” ku flitet për sigurinë por realiteti sot është krejt i kundërt.
“Hahahahaahhahahahahahaha shkon legjenda Igli Tafa organizon konference per sigurine me One, sot One offline”, shkruan Gentian Progni teksa poston foton më poshtë:
Vlen të theksohet fakti se kompania “One Albania” ka një shërbim skandaloz ndaj klientëve të saj, ku pothuajse çdo ditë ka denoncime për zhvatje “padrejtësisht” të qytetarëve.
Së fundmi si aksioner në kompaninë “One” është shtuar edhe bashkëshortja e Klodian Zotos së inceneratorëve.
- ‘One Albania’ ofron shërbim skandaloz
Më 24 Gusht të vitit të kaluar, abonentët e kompanisë së telefonisë celulare, “One”, u gjendën pa pritur dhe pa asnjë paralajmërim në mungesë totale të shërbimit.
Ky ishte momenti më kulminant i një sjelljeje aspak rigoroze dhe normale të kompanisë me klientët e saj, pas një serie të mëparshme të ndërprerjes së sinjalit për minuta, madje edhe për orë të tëra. Klientët nuk arritën të merrnin asnjë përgjigje serioze nga kompania “One” për këtë ndërprerje të plota të sinjalit.
Në 24 Tetor 2023, Autoriteti i Komunikimeve Elektronike dhe Postare vendosi të gjobisë shoqërinë ‘One” shpk me 10 milionë lekë të reja, për shkelje të disa detyrimeve që rrjedhin nga ligji “Për komunikimet elektronike dhe postare”. Një nga pikat që penalizoi shoqërinë ishte pikërisht mungesa e shërbimit të plotë, më saktësisht ndërprerja pa asnjë njoftim e sinjalit për abonentët.
Gjithashtu, një ndër shkeljet ishte dhe ndërprerja pa paralajmërim e shërbimit celular ndaj klientëve që vonojnë kryerjen e pagesës mujore ndaj kompanisë së telefonisë së lëvizshme.
- ‘One Albania’ edhe më herët ka qenë pjesë e sulmeve kibernetike
Kujtojmë që më “One Albania” ra pre e një sulmi kibernetik më 25 dhjetor te vitit 2023, duke cënuar të dhënat e 1.2 milionë abonentëve të saj. Sulmi kibernetik u mor përsipër nga grupi i ashtuquajtur “Homeland Justice”, teksa gjeti të pambrojtur kompaninë celulare dhe futi në kolaps të gjitha sistemet e saj.
Por edhe pse shërbimet nuk funksiononin dhe sistemet ranë, kompania “One Albania” vazhdoi propagandën duke u mundur të përgënjeshtrojë sulmin dhe mosfunksionimin e sistemit duke thënë se nuk janë ndikuar nga ky incident.
Gjatë kësaj periudhe, hakerat “Homeland Justice” kanë publikuar vazhdimisht dokumente të brendshme të kompanisë telefonike “One Albania” në kanalin e tyre në Telegram.
