Kryetari i Njësisë Administrative Fushë Kuqe, Kristo Martinaj, është ndaluar nga policia pas dyshimeve për shpërdorim të detyrës.
Sipas hetimeve të kryera nga policia, Martinaj ka tentuar të përfitojë një sipërfaqe toke në lagunën e Patokut, duke porositur shtetas të ndryshëm që të hedhin inerte pranë lokalit të tij, në një zonë të mbrojtur, me qëllim përfitimin e sipërfaqes së tokës.
“Specialistët për Hetimin e Krimeve të Komisariatit të Policisë Kurbin, si rezultat i hetimeve të kryera për disa javë, në drejtimin e Prokurorisë, për një rast të shpërdorimit të detyrës, kanë ndaluar me inciativë shtetasin K.(F.) M., 55 vjeç, me detyrë kryetar i njësisë administrative Fushë Kuqe, Kurbin”, njofton policia.
Materialet procedurale i kaluan Prokurorisë së Lezhës, për veprime të mëtejshme, për veprat penale “Shpërdorimi i detyrës” dhe “Pushtimi i tokës”.
