Nga Boldnews.al
Ish-shefi i Policisë Rrugore të Tiranës, Erion Ahmeti, gjendet në atë që konsiderohet si “listë e sigurt” për të qenë një nga 12 drejtorët e rinj të Policisë në Qarqe, pavarësisht pikëpyetjeve të rëndësishme që janë ngritur më herët mbi integritetin e tij professional.
Në fundjavën që lamë pas, Policia e Shtetit publikoi listën dhe pikëzimin e kandidatëve për plotësimin e 12 pozicioneve në funksionin “Drejtor i Policisë Vendore”. Emri i Erion Ahmetit gjendet i dhjeti në këtë listë.
Ky pozicion “i lakmuar”, aq më tepër që ka lënë pas emra drejtuesish policie që kanë dhënë kontribut ndër vite në luftën kundër krimit të organizuar, ngre pikëpyetje mbi një skemë “lobimi” në favorin e tij.
Të dhëna të ndryshme, indirekte, krijojnë dyshimet se “lobuesi” kryesor për emrin e Erion Ahmetit është Ard Veliu, dikur ish-drejtor i Përgjithshëm i Policisë dhe më tej Drejtor i Agjencisë së Mbikqyrjes Policore, përpara se të përfshihej zyrtarisht në radhët e “Rilindjes” së Edi Ramës, fillimisht si zv.ministër i Infrastrukturës dhe tashmë administrator i shoqërive së prodhimit të armëve, “Kayo”.
Brenda radhëve të Policisë, Ard Veliu njihet si “mentori” i Erion Ahmetit. Gjatë kohës që Veliu ishte kreu i Policisë së Shtetit, Ahmeti ka qenë një nga njerëzit e tij më të afërt.
Ky raport duket se ka nxitur Veliun që të mos merrte asnjë masë ndaj Erion Ahmetit, pavarësisht akuzave dhe denoncimeve publike në favor të tij. Ahmeti u largua nga Rrugorja e Tiranës, vetëm pasi Ard Veliu u largua nga Drejtor i Përgjithshëm i Policisë dhe vendin e tij e mori Gledis Nano.
Burime që i njohin nga afër, deklaruan për “Boldnews.al” se raporti i ngushtë Ard Veliu-Erion Ahmeti, kanë fillesën e tyre që në faktin që janë nga e njëjta zonë.
Nga e njëjta zonë është edhe drejtori aktual i Policisë, Ilir Proda, i cili po drejton procesin e rekrutimit dhe pikëzimit të kandidatëve për drejtor policie në nivel qarku, ku spitak emri i Erion Ahmetit.
Për më tepër, të njëjtat burime thonë se Ard Veliu luan edhe rolin “informal” të këshilltarit të kryepolicit Ilir Proda.
Si “u përgatit” lista
Erion Ahmeti ka ushtruar për shumë vite funksione në Policinë Rrugore, si edhe ka marrë së fundmi gradën “drejtues”, e cila e lejon atë që të kandidojë për pozicionin “Drejtor Policie”.
E, megjithëse me një përvojë jo shumë të madhe në luftën kundër krimit, ai arriti të dalë në krye të listës, përpara emrave që kanë vite në gradë të lartë dhe që kanë dhënë kontribut në Policinë e Shtetit.
Nga një vështrim i listës së pikëzimit të kandidatëve, rezulton se Erion Ahmeti ka marrë shumë më tepër pikë se sa Tonin Vocaj, Skënder Hitaj apo edhe Altin Qato e të tjerë,, funksionarë që kanë vite përvojë në Policinë e Shtetit.
Renditja e Ahmetit në “top-listën” e kandidatëve për Drejtor Vendor Policie është një tjetër pikëpyetje mbi procesin e rekrutimit të drejtorëve të rinj, pasi është e paqartë se cilat cilësi dhe kritere apo vjetërsi e kanë renditur atë me pikë më shumë se zyrtarë të tjerë policorë që kanë edhe vite, edhe përvojë profesionale më shumë se sa ai.
Kandidatët për drejtor Policie/ Emri i Erion Ahmetit hedh në erë të gjithë procesin
