Janë zbardhur detaje të reja nga krimi në familje që ndodhi në Shtetete e Bashkuara të Amerikës, ku shqiptarja Bruna Flamuraj dyshohet se është vrarë me armë zjarri nga bashkëshorti i saj Lindi Flamuraj.
Krimi i rëndë u regjistrua rreth orës 2 të mëngjesit së të enjtes në një shtëpi në Worcester, në qytetin e Bostonit në Massachusetts.
Policia tha se gruaja u gjet e vdekur në katin e dytë dhe burri kishte mbetur i plagosur pas sherrit me bashkëshorten dhe u dërgua në spital me plagë të rënda. Krimi besohet se ndodhi në sy të vajzës dhe prindërve.
Duket se shkak për sherrin mes çiftit ishte bërë xhelozia. Policia amerikane nuk ka dhënë ende detaje dhe ekspertët po bëjnë këqyrjet e nevojshme dhe mbledhjet e provave, duke hetuar dinamikën dhe motivet, apo nëse ka persona të tjerë të përfshirë.
“Gruaja duke bërtitur shumë me zë të lartë”, thanë fqinjët në Boston të SHBA-ve.
Policia po e quan një krim në familje. “Vërtet e frikshme”, tha një fqinj që nuk donte të identifikohej, për rrjetin televiziv CBS.
“Ne u zgjuam dhe dëgjuam një grua që bërtiste me zë të lartë. Dhe pastaj pritëm vetëm disa sekonda dhe dëgjuam më shumë ulërima dhe më pas dëgjuam disa të shtëna armësh dhe kështu thirrëm policinë”, shpjegoi një prej tyre.
Ajo shtoi se dëgjoi gjashtë apo shtatë të shtëna armësh pas britmave të “gjakderdhjes”.
Fqinjët thanë se nuk i njohin banorët në rrugën e vogël anësore në anën perëndimore të Worcester-it, por janë qartësisht të shqetësuar nga ajo që ndodhi.
“Është një tragjedi kaq e madhe kombëtare sa kjo po ndodh kudo”, tha fqinja Nancy Muszynski. “Dhe uroj që të ketë më shumë shërbime të shëndetit mendor dhe sociale në dispozicion për familjet”.
