Gazetarja Klodiana Lala, ka qenë e ftuar në emisionin “Të Paekspozuarit”, ku ka folur për dosjen e ish-deputetit socialist Jurgis Çyrbja, që çoi në arrestimin e tij nga SPAK.
Lala tregoi disa komunikime mes pjesëtarëve të organizatave kriminale, të cilët kanë ndikuar në listën e PS për qarkun e Durrësit, duke bërë që Jurgis Çyrbja të vendoset i pesti. Në bisedat e krimit të organizuar del edhe një person me emrin “Gjushi”, ku sipas gazetares i referohen ish-kryebashkiakut të Durrësit Vangjush Dako.
“Kam arritur të shohë disa nga mesazhet që përbëjnë interse publik. Kam kuptuar që Edmond Çekiçi, i ekzekutuar, ka ndikuar te zyrtarë të lartë socialistë për zhvendosjen e emrit të Çyrbes nga i shtati te i pesti në listën e PS në Durrës. Kam parë mesazhe ku Çekiçi i shkruan Çyrbes, thotë “e përfundova punën tënde, mos fol me njeri, e kemi mbyllur dhe do të shkosh aty ku duhet në listë”. Çyrbja, më rezulton se i është thënë “faleminderit vëlla isha keq, më ngrite moralin”.
Më pas Altin Hajri, i referohet mes të tjerash në komunikim, përmend një emër që duhet të punojmë me kujdes, “se mos mendon Gjushi se po përçahemi”. Kush thirret Gjush në Durrës? Ne e dimë shumë mirë. Vangjush Dako në dosjen 339 grupi Avdylaj ndikonte për kandidatët në zgjedhje. Dyshimet më çojnë të mendoj se Çyrbja është vendosur i pesti, por duhet të zbulohen kush janë zyrtarët socialistë që u ndikuan të fusin Çyrben në listë. Aty thuhet ti i pesti, Liri i shtati… Bëhet fjalë për Ilir Ndraxhit, që edhe ai rezulton i shtati në listë.
Mund të ketë edhe të tjera, kaq kam arritur unë. Unë dyshoj se janë nivele më të larta, sepse në fund firmën e ka vënë Edi Rama për listën. Prokuroria duhet të sqarojë rolin e Vangjush Dakos, ai propozonte emrat e kandidatëve për deputetë. Të shohim si e ka futur Çyrben. Gjithë krimi i organizuaar ishte vënë në lëvizje të ndikonte. Kush e dërgoi Çyrben deri aty? Ka negociuar krimi i organizuar. Kush e firmosi? Këtë të na e tregojë SPAK”, tha Lala.
