Gjykata e Posaçme e Apelit ka prishur vendimin e Shkallës së Parë të GJKKO-së për avokatin Alban Bengasi, i cili akuzohet se ka paguar të penduarit të drejtësisë Nuredin Dumanit 120 mijë euro për të rrahur dhe vrarë ish-bashkëshorten e tij, Blerta Bengasi, pasi kishte mësuar se e tradhtonte.
Bengasi ishte dënuar nga GJKKO me 2 vite burgim, ku për shkak të gjykimit të shkurtuar dënimi i ulej në 1.4 vite burgim, duke u shpallur fajtor vetëm për veprën penale “Dhuna në familje”, kryer në bashkëpunim, ndërsa e shpalli të pafajshëm për veprën penale “Grupi i strukturuar kriminal”.
Ndërkohë, Apeli i ka rënduar akuzat, duke e shpallur fajtor edhe për të tjera vepra penale dhe e ka dënuar në total me 7 vite burgim, ku për shkak të gjykimit të shkurtuar dënimi përfundimtar i ulet në 4 vjet dhe 8 muaj burgim.
“- Deklarimin fajtor të të pandehurit Alban Bengasi për kryerjen e verës penale të parashikuar nga neni 130/a paragrafi i parë në lidhje me nenin 28 paragrafi i katërt dhe nenin 334 pika 1 të Kodit Penal, duke caktuar si dënim masën prej 7 vjet burgim.
– Deklarimin fajtor të të pandehurit Alban Bengasi për kryerjen e veprës penale të parashikuar nga paragrafi i dytë i nenit 333/a të Kodit Penal, duke caktuar si dënim masën 3 vjet burgim.
– Në bazë dhe për zbatim të paragrafit të tretë të nenit 55 të Kodit Penal, bashkimin e dënimeve në një dënim të vetëm në masën 7 vjet burgim.
– Në bazë dhe për zbatim të pikës 1 të nenit 406 të Kodit të Procedurës Penale, uljen e dënimit me një të tretën e tij, duke mbetur përfundimisht 4 vjet dhe 8 muaj burgim.” – thuhet në vendimin e Apelit.
Gjykata ka vendosur që Alban Bengasi ta vuajë dënimin në një burg të sigurisë së lartë. Kujtojmë se ai do të rikthehet në qeli për ta kryer dënimin, pasi në muajin Korrik Apeli i GJKKO e liroi dhe ai po gjykohej në gjendje të lirë.
Vendimi i sotëm nga Apeli është marrë nga trupa gjykuese e përbërë nga trupa gjykuese e përbërë nga gjyqtarët Florjan Kalaja (kryesues), Dhimitër Lara (anëtar), dhe Engert Pëllumbi (anëtar).
Kujtojmë se Alban Bengasi u arratis në fillim, por vendosi të kthehet nga Dubai, pasi kërkesës së ish-bashkëshoshortes së tij për lehtësim të masës së sigurisë ndaj Alban Bengasit, me të cilin ka dy fëmijë.
Blerta Bengasi, ish-bashkëshortja e avokatit Alban Bengasi, ra pre e një sulmi fizik më 31 Janar të vitit 2020 teksa qëndronte në automjetin e saj. Ajo humbi vetëdijen për të paktën 9 ditë, megjithatë arriti t’i tregojë hetuesve identitetin e autorit duke thënë se ai ishte një person i moshës 28-33 vjeç, rreth 178 cm i gjatë, ezmer, flokë të errët të shkurtër.
Më shumë se 3 vite pas kësaj ngjarje, i penduari i drejtësisë Nuredin Dumani u tregoi hetuesve se porositësi i këtij sulmi ishte bashkëshorti i saj, Alban Bengasi me të cilin në atë kohë ajo ishte në proces divorci, i cili kishte paguar 120 mijë euro.
Mbi dyshimet se gruaja e tij e tradhtonte me shokun e ngushtë, ai i ofroi shumën marramendëse Dumanit për ta vrarë. Për ta dhunuar, Nuredin Dumani u kontaktua nga Festim Qoli në vitin 2019, njohje e avokat Bengasit, i cili i kërkoi me çdo kusht Dumanit që ajo të rrihej barbarisht, madje t’i thyhen këmbët, duart dhe të shpërfytyrohej në fytyrë. Gruaja u mbajt në vëzhgim për disa ditë në zonën e Kodrës së Diellit në Tiranë, aty ku kishte shtëpinë, nga Nuredin Dumani dhe Eljo Bitri.
Ky i fundit e qëlloi me grushte dhe sende të forta në fytyrë, por nuk i theu këmbët dhe duart siç Bengasi dhe Qoli u kishin kërkuar. Në vijim, Nuredin Dumani u takua në një kafe me avokatin Alban Bengasi, i cili i shprehu pakënaqësinë që ish-bashkëshortja e tij nuk ishte dhunuar ashtu siç i kishte kërkuar. Më tej Bengasi i ofroi shumën 120 mijë euro Nuredin Dumanit për ta eleminuar, shumë që sipas bashkëpunëtorit të drejtësisë ishte e pamjaftueshme për vrasjen e një gruaje. I vendosur për të zhdukur nga faqja e dheut ish-bashkëshorten, për të cilën kishte kaq shumë mllef, Alban Bengasi i tha Dumanit se gjithsesi një punë të tillë do e bënte dikush, duke përmendur edhe Gjergj Cukalin, të të ashtëquajturin “i forti” i “Myslym Shyrit”.
