Deputetja e Partisë Demokratike, Elda Hoti u thirr këtë të enjte në SPAK, ku u mor në pyetje në lidhje me lëndën e lëngshme që hodhi në sallën e Kuvendit në seancën plenare të 17 tetorit.
Ajo u kallëzua në SPAK nga Policia e Tiranës për veprat penale “Kanosja” dhe “Shkelja e rregullave mbi lëndët helmuese”, ku nuk dihet se në çfarë provash i bazojnë uniformat blu ngritjen e këtyre dy akuzave.
Ajo hodhi në sallë një lëndë të lëngshme, për të cilën Spiropali doli që në sekondë të parë në konkluzionin se ishte benzinë dhe ministri i Brendshëm, Ervin Hoxha u hodh direkt në sulm se do e çonte në Prokurori për zjarrvënie të qëllimshme. Por, pas daljes nga Kuvendi, Elda Hoti deklaroi se ajo që hodhi në sallë ishte vetëm aromatizues.
Pas daljes nga SPAK, Hoti në prononcimin për mediat deklaroi se para oficerëve të BKH-së ka deklaruar se ka thënë të njëjtat gjëra që tha dhe në Kuvend. Deputetja demokrate ngriti pikëpyetjet se pse nuk thirren ministrat e Ramës për aferat korruptive të tyre, por SPAK shqetësohet për një veprim banal të saj.
Sipas Hotit, SPAK duhet të shqetësohet për korrupsionin e Qeverisë dhe krimin që po terrorizon vendin, duke marrë dhe jetë të pafajshme.
“Pse nuk thërret SPAK Belinda Ballukun qe një më të rënë të lapsit në tunelin e Llogarasë ka fituar 50 mln euro. Pse nuk thërret SPAK Ulsi Manjën për dosjen 184, Frida Krifcën që ka vjedhur fondet nga BE, Ogerta Manastirliun për koncesionet në shëndetësisë. Për këto duhet të shqetësohet SPAK.
Aferat korruptive që kanë bërë, për këtë duhet të shqetësohet SPAK. Sa herë i prishet qetësia regjimit.Brenda SPAK deklarova atë çka deklarova dhe në parlamentin e Shqipërisë, është e turpshme akuza që kanë ngriotur dhe që shqiptarët të merren me atë. Shqetësim për çdo shqiptar duhet të jetë masakra e ndodhur në Shkodër. Sot drejtësia duhet të shqetësohet se si banda dhe krimi bëjnë terror dhe rrezikojnë jetën e qytetarëve të pafajshëm. Sot drejtësia duhet të shqetësohet se si bandat vendosin drejtorët e policisë.” – deklaroi deputetja Elda Hoti pas daljes nga SPAK.
