Kryeministri Edi Rama, gjatë konferencës së përbashkët me ambasadorin e BE-së Silvio Gonzato, iu përgjigj dhe pyetjes së gazetarëve nëse a do të ketë dialog me opozitën.
Rama deklaroi se opozita ka zgjedhur vetë që të përjashtohet, edhe pse ishin deputetët e tij të cilët i përjashtuan deputetët e PD-së me nga 60 ditë nga aktivitetet parlamentare bazuar në një rregullore të miratuar vetëm me kartonat e mazhorasncës.
Kreu i qeverisë deklaroi se opozita ka zgjedhur që të vrasë veten politikisht dhe ai nuk e ndalon dot këtë gjë legjitime.
“Problemi është që kur duhet të vallëzosh, duhen dy vetë. Dhe nuk hidhet vallja nëse të dy nuk duan ta hedhin vallen. Kush është për dialog sot, është shumë e thjeshtë. Kush është i gatshëm të flasë. Kush nuk është për dialog është shumë e thjeshtë, kush nuk është i gatshëm të flasë. Ndjehen të përjashtuar, më vjen shumë keq, është vetëpërjashtim absolut pa asnjë bazë faktike të lidhur me qëndrimet tonë. Është zgjedhja e tyre legjitime. Jemi vend i lirë, demokratik, secili bën zgjedhjen e vet. Edhe zgjedhja për të vrarë veten… politikisht, është legjitime, nuk e ndalojmë dot. Kur ishim ne në opozitë, dërgonim letra për të folur, por nuk kemi marrë asnjë përgjigje. Ndërkohë që tani situata është ndryshe. Por diskutimet bëhen përmjet gjuhës, jo përmes krahëve, këmbëve, gjokseve. Kjo është shumë e thjeshtë” – deklaroi Rama.
