Nga Boldnews.al
Ish-drejtori i Operatorit të Shpërndarjes së Energjisë Elektrike (OSHEE), Ardian Çela, është paraqitur këtë të Enjte në Prokurorinë e Posaçme. Nga SPAK-u nuk ka ende një njoftim apo informacion zyrtar për këtë ftesë, por besohet se ai është pyetur për hetimin penal që po zhvillohet ndaj ish-deputetit të sapo-arrestuar të Durrësit, Jurgis Çyrbja. I pyetur nga gazetarët në dalje të Prokurorisë së Posaçme, Çela ka bërë një shmangie me stil nga thelbi.
Çela një zyrtar me pushtet të gjatë në qeverisjen e Edi Ramës, është nga ata socialist që nuk janë shumë të ekspozuar politikisht, por që ka mbi kurriz një mal me akuza publike, të pahetuara dhe, rrjedhimisht pa asnjë penalizim.
Çela përbën rastin tipik të zyrtarit të “Rilindjes”, i cili, pasi qëndron për shumë vite në pushtet, largohet me qetësi dhe pa zhurmë dhe kthehet në një simbol të pandëshkueshmërisë.
Ardian Çela është një makineri votash për socialistët e Ramës në qytetin e tij. Dikur krahu i djathtë dhe njeriu më i besuar i Vangjush Dakos, ish-kryebashkiakut të Durrësit, të dy këta ndërtuan sistemin e “patronazhimit”.
Ai qëndroi në detyrën e drejtorit të OSHE-së për gati 10 vjetë në qeverisjen e Edi Ramës, duke u dëshmuar në këtë mënyrë se ai nuk ishte një “drejtor i thjeshtë”, nga ata që emërohen e shkarkohen nga kryeministri dhe kryesocialisti sipas humorit që ai ngrihet në mëngjes.
Ai vijoi i patrazuar për shumë vite detyrën, edhe pse akuzat publike për përfshirjen e tij në korrupsion rriteshin në mënyrë eksponenciale.
Një hetim i SPAK-ut shkoi shumë pranë tij, por nuk arriti (ose nuk guxoi) të kalonte gardhin drejt Ardian Çelës.
Në Dhjetor të vitit 2022, Albana Ferraj, ish-shefja e tij e kabinetit, njeriu që besohej se kryente të gjithë punët dhe urdhrat e drejtorit Çela, u arrestua me urdhër të Prokurorisë së Posaçme, pasi “ka përfituar 131 mijë euro nga kompania italiane përmes krijimit të një marrëdhënieje fiktive, duke përdorur edhe një kompani tjetër me seli në Shqipëri”.
Hetimi i SPAK-ut nuk vijoi më lart, duke u prerë filli i veprimeve deri tek Ferraj. Ky ishte rasti i vetëm kur Prokuroria e Posaçme hodhi vështrimin nga tenderat dhe dyshimet për abuzime në OSHEE.
Në dosjen hetimore, të përgatitur nga SPAK-u për ish-zv.kryeministrin Arben Ahmetaj, përmendet edhe një tender i dyshimtë korruptiv në vlerë disa miliona euro, me përfitues Klodian Zoton e inceneratorëve.
Por, ky rast përmendet vetëm shkarazi dhe nuk rezulton, të paktën deri më tani, të jetë kryer ndonjë veprim i mëtejshëm.
Ardian Çela u largua “qetësisht” në dukje nga detyra në krye të OSHEE-së, në Qershor 2023. Por në realitet ishte Ministrja e linjës Belinda Balluku që e spostoi gati me forcë drejtuesin politik të qarkut Durrës për ti bërë vend kanakarit të saj Eneo Karakaçi.
Tashmë që Çela nuk është më as drejtues politik dhe as drejtor i rëndësishëm ndoshta Lideri Suprem po i përgatit publikut lodrën e radhës për t’u marë disa ditë. Kjo për shkak të faktit që në dosjen Çyrbja malavita e Durrësit e projekton këtë të fundit të tretin në listën përfundimtare të PS-së për deputet. Fakti është që Çyrbja ishte i treti në listën që shkoi në KQZ me firmën e Edi Ramës.
Ndoshta Rama e ka justifikuar veten se kjo listë i ka ardhur si propozim nga socialistët lokal. Dhe kuptohet që socialistët lokal drejtoheshin nga zoti Çela. Me një gur lideri supreme vret disa zogj, shpëton veten, i bën qejfin Ballukut, kënaq shqiptarët dhe i thotë Brukselit burokrat “Ja unë po e luftoj korrupsionin”.
Lideri supreme e ka treguar veten se kur si duhen më njerzit, i hedh si limona të shtrydhur.
