Pas atentatit me 2 të vrarë dhe dy të plagosur, autorët e dyshuar të krimit kanë djegur makinën me të cilën janë larguar nga vendit i krimit.
Në pamje duket që është bërë shkrumb e hi ndërsa policia njoftoi më herët se brenda saj u gjetën dy automatikë që dyshohet se janë përdorur në ngjarjen ku u vra Hamza Lici dhe Flutura Basha dhe u plagosën rëndë Arlind Bushati dhe Bashkim Basha.
Mjeti u gjet nga policia në zonën e Grudës së Re në Shkodër.
Njoftimi i policisë:
Në vijim të informacionit të dhënë më parë për ngjarjen e ndodhur në aksin rrugor “Shkodër-Koplik”, në Dobraç, ju informojmë se:
Nga kontrolli i ushtruar në automjetin që udhëtonin shtetasit H. L., dhe A. B., u gjetën 3 armë zjarri (pistoleta).
Ndërkohë shërbimet e Policisë gjatë kontrollit të zonës për kapjen e autorëve, në fshatin Golem kanë konstatuar të djegur plotësisht një automjet tip “Range Rover” dhe 2 armë zjarri automatike.
Grupi i posaçëm hetimor në drejtimin e Prokurorisë së Shkodrës, po vijon punën për zbardhjen e rrethanave, sigurimin e provave me qëllim dokumentimin ligjor të ngjarjes, identifikimin dhe kapjen e autorëve.
