Dhjetë juristë kanë aplikuar për të plotësuar vakancën e plotë në Gjykatën Kushtetutese, të krijuar pas dorëheqjes së gjyqtares Elsa Toska, mandati i së cilës përfundonte në nëntor të vitit 2028..
Në 30 shtator 2024, Parlamenti shpalli thirrjen për aplkime për aplikimit për “vendin vakant, mandat plotësues, për 1(një) anëtar të Gjykatës Kushtetuese, me qëllim plotësimin e vakancës të krijuar për shkak të deklarimit të mbarimit përpara afatit të mandatit të gjyqtares Znj. Elsa Toska, i cili përfundon më datën 14.11.2028, referuar Vendimit të Kuvendit nr. 133/2019 “ Për zgjedhjen e zonjës Elsa Toska, anëtare të Gjykatës Kushtetuese”.
Afati për aplikime përfundoi në 28 tetor 2024 dhe tashmë është qartësuar lista e plotë e kandidatëve për plotësimin e vendit vakant.
Në listën e aplikantëve janë dy ish-drejtuesit e Këshillit të Lartë Gjyqësor e Këshillit të Lartë të Prokurorisë, Naureda Llagami e Alfred Balla. Po ashtu, ka aplikuar për vendin vakant në Kushtetuese kryetari i Komisionit të Pavarur të Kualifikimit, Roland Ilia, Komisionerja Publike e Vetingut, Irena Nino, ish-anëtarja e KLP-së, Nurihan Seiti, si edhe juristët Klodian Rado, Eris Hysi, Gentian Zyberi, Sinan Tafaj dhe Nertila Sadedini.
Të gjithë këta emra do të kalojnë në filtrin e Parlamentit dhe njëri prej tyre pritet të emërohet në vendin e lënë bosh nga ish-gjyqtarja Elsa Toska.
Sipas njoftimit të Parlamentit, gjyqtari që do të zgjidhet në këtë procedurë, do të qëndrojë në detyrë deri në datën 24 nëntor 2028.
