Deputeti i Partisë Socialiste, Bujar Çela është paraqiturmëngjesin e kësaj të mërkure në Prokurorinë e Posaçme (SPAK).
Ai është parë të futet në godinën e SPAK në shoqërinë e avokatit të tij, teksa do të merret në pyetje nga oficerët e BKH-së në lidhje me shpërthimin e regjistruar pasditen e 1 Marsit në magazinën në ndërtim në pronësi të tij në Lushnjë.
Ndaj Bujar Çelës janë ngritur akuzuat për veprat penale “Shkelja e rregullave të mbrojtjes në punë”, “Ndërtimi i paligjshëm”, dhe “Shkatërimi i pronës nga pakujdesia”, parashikuar nga nenet 289 prg. 2, 199/a prg. 4, dhe 161 të Kodit Penal.
Fillimisht për këtë çështje hetimet nisën nga Prokuroria e Fierit, por më pas, ajo shpalli moskompetencë dhe hetimet kaluan në duart e Prokurorisë së Posaçme.
Kujtojmë se si pasojë e shpërthimit mbetën të vdekur babë e bir, Roland dhe Lidio Hoxha dhe u plagosën shtatë të tjerë, mes të cilëve dhe vetë deputeti i PS-së, Bujar Çela. Gjithashtu, u shkaktuan dhe dëme të mëdha materiale në banesat dhe bizneset pranë.
Bashkia e Lushnjës e kuptoi vetëm 1 ditë pas shpërthimit, se deputeti Bujar Çela ishte duke ndërtuar një kapanon gjigand në tokën e tij në zonën industriale, në shkelje të lejes së dhënë më 19 shtator 2023.
Siç zyrtarët e institucioneve vendore në Lushnje deklaruan, sistemi online i lejeve në bashki nuk punonte, dhe duke mos pasur njoftim, askush nuk doli në terren për të parë nëse po zbatoheshin rregullat e mbrojtjes në punë.
Vlen të theksohet fakti se nga hetimet paraprake të Prokurorisë së Fierit ka rezultuar se shpërthimi ka ndodhur për shkak të një avarie gjatë procesit të punës që kryente viktima Roland Hoxha për prerjen dhe çmontimin e disa profileve të hekurit duke përdorur flakën me nxehtësi të lartë
“Nga hetimet e kryera dhe nga konkluzionet paraprake të ekspertëve dyshohet se shpërthimi është shkaktuar nga një avari që ka ndodhur gjatë procesit të punës që kryente viktima Roland Hoxha për prerjen dhe çmontimin e disa profileve të hekurit duke përdorur flakën me nxehtësi të lartë që prodhohet nga djegia dhe përzierja e oksigjenit me Acetilenin. Kjo avari ka bërë që një nga bombulat e cila dyshohet të këtë qenë më përmbajtje gazi acetilen ka shpërthyer duke shakaktuar dhe dëmet me pasojë humbjen e jetës së dy shtetasve, plagosjen e shtate të tjerëvë dhe dëmtimin e objektit, banesavë dhe e bizneseve përreth.” – thuhet në dosje.
Në dosje theksohet dhe se deputetit Bujar Çela iu dha afat 1 vjeçar me objekt për tregtimin dhe magazimin e materialeve të ndryshme, por sipas hetimeve, ai ka tejkaluar afatet.
“Nisuar nga hetimet paraprake të kryera nën drejtimin e Prokurorise Prane Gjykates së Shkallës së Parë të Jurdiksionit të Përgjithshëm Fier ka rezultuar se për objektin ku ka ndodhur shpërthimi, nga Bashkia Lushnje, në muajin shtator 2023 është miratuar leja ndërtimore për objekt 1 kat për tregtimin dhe magazinimin e materialeve te ndryshme në emër te shtetasit Bujar Çela me afat 1 vjecar, por që pas aktit të konstatimit të datës 02.03,2024 nga Inspektoriati Vendor i Mbrojtjes së Territorit bashkia Lushnje ka rezultuar se subjekti që ka kryer punimet ne objekt ka tejkaluar lejen e ndërtimit të dhënë nga Bashkia Lushnje.” – thuhet në dosje.
