Qindra qytetarët janë duke protestuar këtë të diel në hyrje të Portit të Durrësit, teksa është nisur drejt brigjeve të Durrësit anija me mbetjet toksike të dala po nga porti i Durrësit dhe të evidentuara në Tailandë, e cila i ka kthyer sërish mbrapsht drejt vendit tonë. Anija pritet të
Në protestë janë qytetarë, aktivistë të shoqërisë civile, si dhe deputetë dhe eksponentë të Partisë Demokratike, teksa kanë shpalosur dhe pankartën me mbishkrimin “Mbetje të rrezikshme, Qeveri toksike!”.
“Ato janë të dëmshme, dëmtojnë shëndetin e gjithkujt, ndaj dhe sot ne protestojmë, të gjithë qytetarët duhet të protestojnë.”, tha një prej protestuesve.
Ndërsa një tjetër pjesëmarrëse, u shpreh se fakti që kjo sasi mbetjesh është kthyer mbrapsht tregojnë sa të rrezikshme janë. Ajo kërkoi nga qytetarët e Durrësit dhe mbarë Shqipërisë që të reagojnë fort.
Ambientalisti Sazan Guri u shpreh se sot duhet të reagojnë qytetarët, prindërit e çdo fëmije.
“Mos rrini në kafe në këtë ditë, jeni zëri i një prindi dhe kryefamiljari që kemi për detyrë të reagojmë ndaj këtyre mbetjeve të rrezikshme. Edhe djalli ta organizonte këtë protestë do të vija, sepse jam i bindur se çfarë i ndodh vendit nga kjo gjëmë”, tha Guri.
Ai kërkoi që këto mbetje t’i nënshtrohen analizave për të parë se çfarë përbërjesh kanë, pasi edhe nëse groposen ato mund të dëmtojmë gjithçka.
Deri më tani, Qeveria ka tentuar ta fshehë përgjegjegjësinë, teksa ende nuk dihet se çfarë do të bëhet me mbetjet e rrezikshme që nesër në orën 08:00 mbërrijnë në portin e Durrësit.
Pak ditë më parë, drejtuesi i organizatës mjedisore “Basel Action Network” (BAN), me qendër në SHBA, iu drejtoi një letër të dytë ministres së Mjedisit dhe Turizmit, Mirela Kumbaro Furxhi, dhe koordinatores për Konventën e Bazelit në Shqipëri, Elvana Ramaj, ku iu bëri thirrje për transparencë në procesin e hapjes dhe testimit të kontejnerëve me mbetje.
Eksporti i dyshuar i mbetjeve të rrezikshme nga Shqipëria u denoncua më 5 gusht nga organizata mjedisore “Basel Action Network”, e cila ngriti alarmin se një anije gjigante kontejnerësh prej 175 mijë tonësh e linjës “Maersk” u zhduk në fund të korrikut nga radarët afër Cape Town në Afrikën e Jugut, pas një sinjalizimi të bërë nga ajo tek autoritetet vendase.
Më pas u zbulua se mbetjet e dyshuara si të rrezikshme ishin prodhuar nga gjiganti metalurgjik “Kurum” dhe janë eksportuar nga kompania “Sokolaj shpk” në Durrës, në bashkëpunim me G.S. Minerals në Kroaci.
Tajlanda, destinacioni i mbërritjes, refuzoi importin pas sinjalizimit për mbetjet e rrezikshme, të cilat ishin nisur nga Durrësi në fillim të korrikut në rreth 100 kontejnerë dhe që besohet se vijnë nga hiri i oxhaqeve metalurgjike elektrike.
Gjithsesi, Partia Demokratike pretendon se mbetjet e rrezikshme janë në një sasi të konsiderueshme që nuk mund t’i prodhojë dot vetëm kompanian “Kurum”, duke ngritur dyshimet se shteti shqiptar është përfshirë në një trafik ndërkombëtar të mbetjeve të rrezikshme.
