Sekretari i Përgjithshëm i Partisë së Lirisë, Tedi Blushi vijoi me akuzat e ashpra ndaj kreut të Prokurorisë së Posaçme, Altin Dumani, të cilin e cilësoi një vrasës me pagesë ndaj opozitës.
Ai u shpreh në A2 CNN se fati i Altin Dumanit do të jetë më i zi se ai i Katicës në Maqedoninë e Veriut.
“Fundi i Altin Dumanit në Shqipëri do të jetë më i zi se i Katicës në Maqedoni. Besoj se e dini fatin e kryeprokurores speciale në Maqedoninë e Veriut. Këto paralajmërojnë fundin e Altin Dumanit që është një vrasës me pagesë që nuk ka as dinjitetin e kushëririt të tij Nuredin Dumani.”, tha Blushi.
Sekretari i Përgjithshëm i PL-së tha gjithashtu se në dosjen e ngritur ndaj ish-presidentit Ilir Meta nuk ka asnjë provë apo fakt.
Në lidhje me çështjen e lobingjeve, Blushi u shpreh se në këtë periudhë Meta ka qenë në SHBA në cilësinë e Kreut të Kuvendit dhe nuk ka pasur nevojë të paguante asgjë dhe askënd.
“Nuk ka asnjë provë kundër Ilir Metës. Ju sfidoj të gjithëve të më gjeni ndonjë fakt. Zero. Më jepni një fakt që Meta është i përfshirë në lobingje. Çfarë përgjegjësie mban Meta për lobingjet. Vizitat në SHBA nuk kanë qenë për lobingje. Ai nuk ka qenë kurrë në SHBA si gruaja e Bilalit si Rama. Meta ka qenë i ftuar nga zyrtarë të lartë në cilësinë e kreut të Kuvendit dhe jo si këto pretendime. Nuk ka firmosur asnjë kontratë lobimi.”, tha Blushi.
Pasi dënoi dhunën dhe inskenimin e arrestimit të Metës, Blushi rrëzoi dhe pretendimet se ish-presidenti ka pasur armë në momentin e arrestimit.
“Meta jo vetëm që nuk ishte i armatosur, por edhe kur ka qenë president ka refuzuar Gardën, pasi nuk ka pasur nevojë. Këto janë pallavra që gatuhen nga kuzhina e ndyrë e Edi Ramës. Po të kishte armë do të kishin dalë në media nuk diskutohet. Nuk e dinim për një orë se ku ishte Meta. E dimë që në Shqipëri ka njerëz të zhdukur dhe që nuk dihet ku janë. Komunikova me Gardën dhe Policinë dhe nuk e dinin ku ishte.”, tha Blushi.
