Nga Agim Nesho
Shfaqja e turpshme e Edi Ramës në New York nuk ka të bëjë me një vizitë të një lideri që kërkon të përfaqësojë popullin dhe kombin Shqiptar, një lideri që kërkon të takojë bashkëkombësit e tij, të bashkëbisedojë me ta për të ardhmen e Shqipërisë dhe si të bashkëpunojë me diasporën për të avancuar interesat e kombit. Ai ka vajtur në New York për të treguar me arrogancë pushtetin e pakufishëm të tij, që mund të përdorë dhe blejë çdo influencë, dhe si diktator është pikërisht ai që do të përcaktojë të ardhmen e Shqipërisë.
Sot ai nuk përfaqëson as Partinë Socialiste, ku anëtarët e saj jetojnë dhe ndajnë me gjithë popullin papunësinë, varfërinë, urinë dhe poshtërim të dinjitetit. Ai përfaqëson vetëm kastën e tij klienteliste, deputetët kukulla të përzgjedhur edhe nga krimi vetëm për të duartrokitur, përfaqëson interesat e mafies që pastron paratë e sidomos që po shtrin tregjet, dhe klikave anti-kombëtare që duan të ndajnë kombin tonë.
Sot ky takim ka kushtuar miliona e miliona dollarë sensibilizim dhe propagandë për realizimin e tij. Vetëm një reklamë në Times Square për 3 ditë kushton 350,000 dollarë pa shpenzimet e tjera për takimin. Ai nuk ka frikë të bëjë takime të tilla ekstravagante në shpenzime të cilat ja kalojnë dhe sheikëve arabë, se Shqipërinë e ka kthyer në një burg të madh për opozitën, ku liderët e saj vuajnë dënime, ndërsa liria e fjalës është e kontrolluar.
Rama nuk ka vajtur në New York të takojë shqiptarët, se ai është arsyeja kryesore që mbi 1 milion shqiptarë janë larguar pa shpresë nga politikat e tij. Ai ka vajtur në Amerikë me patronazhistët e tij për tu takuar me njerëz të pastër dhe naivë që duan Shqipërinë, për të takuar njerëz që janë organizuar me të gjitha mjetet dhe mënyrat për të mbushur sallën. Ai ka vajtur në NY për tu treguar amerikanëve që shqiptarët e duan, dhe kur të vijë koha e zgjedhjeve dhe ai të manipulojë dhe vjedhë si gjithmonë zgjedhjet, ata ta besojnë.
Ai përpiqet të krijojë fabulën tek të gjithë shqiptarët në perëndim që ai është e ardhmja e Shqipërisë, lideri “perëndimor”, kur në fakt është diktatori i ngritur mbi kanabis, pastrimin e parave të pista dhe krimin e organizuar. Kanabisi politik po përdoret të fuqizojë realitetin paralel jashtë vendit si një demokraci perëndimore funksionale kur në Shqipëri është instaluar diktatura. Dhe kjo diktaturë fatkeqësisht po instalohet me ndihmën e SPAK-ut, që i ka hapur rrugën në përpjekje për të shkatërruar opozitën. Sot ndjeva dhimbje për ata shqiptarë në NY që dëgjonin diktatorin, ndërsa qindra të tjerë protestonin jashtë kundër diktaturës, për mungesën e pensioneve dinjitoze për prindërit që jetonin në Shqipëri dhe humbjen e demokracisë në vendin e tyre të lindjes.
Diktaturat nuk meritojnë mikpritje por revoltë dhe mospranim, në qoftë se nuk doni ta shikoni Shqipërinë tone të shkatërruar.
Sa për SPAK-un, shpenzimet me miliona dollarë nga diktatori nuk mund të merren parasysh se ai ka të drejtë të shpërdorojë fondet dhe gjakun e popullit Shqiptar.
Edi Rama sot e portretizoi veten e tij mbi partitë politike, si një misionar që i shërben Shqipërisë. Por në realitet është një diktator anadollak që do ta cojë Shqipërinë jo në Bashkimin Europian por në lindjen autokratike.
Por shqiptarët do të ngrihen të marrin në dorë fatet e vendit të tyre!
