Është kërcënuar me jetë gjyqtarja Silvia Albano e seksionit të imigracionit në Gjykatën e Romës.
Ajo është një nga 6 gjyqtarët që pak ditë më parë vendosën të rikthenin urgjent në Itali 12 refugjatët afrikanët të kampit të Gjadërit, për shkak se Egjipti dhe Bangladeshi, vendet e origjinës së refugjatëve, konsiderohen të pasigurta nga Gjykata Europiane e të Drejtave të Njeriut.
Lajmi është raportuar nga agjencia e lajmeve “Ansa”, e cila bën me dije se gjyqtarja Silvia Albano, e cila është edhe kryetare e Magjistratit Demokratik, ka bërë kallëzim në Prokurorinë e Romës.
“Fushata e diskreditimit që u zhvillua kundër magjistratëve romakë dhe në veçanti kundër Silvia Albanos, kontribuoi në ndërtimin e një klime opozitare, urrejtjeje, e cila përfundimisht kaloi në kërcënime serioze për sigurinë dhe jetën e saj. Për shkak të kërcënimeve të rënda të marra, Silvia Albano ka paraqitur sot një ankesë të detajuar në Prokurorinë Publike të Romës”, nënvizon Magjistrati Demokratik në deklaratën e tij.
Anija e marinës italiane solli në total 16 refugjatë afrikanë të kapur në ujërat ndërkombëtarë, në kuadër të marrëveshjes mes dy kryeministrave të dy vende Georgia Meloni dhe Edi Rama, por 4 prej tyre u rikthyen sërish në Itali për shkak se dy ishin minorenë dhe dy të tjerë kishin probleme shëndetësore.
Fillimisht refugjatët vendosen në kampin pritës në Shëngjin dhe pas procedurave u transferuan drejt Gjadrit. Pas vendimit të seksionit të imigracionit të Gjykatës së Romës, ata u rikthyen sërish në Itali.
Marrëveshja Rama-Meloni parashikon strehimin në dy kampet në Shëngjin dhe Gjadër, të refugjatëve burra dhe të rinj (pasi gratë dhe të miturit qëndrojnë në Itali) nga vendet afrikane që kapen në ujërat ndërkombëtare nga autoritetet italiane.
Në kampin e parë pritet të bëhet verifikimi i të dhënave personale të refugjatëve, ndërsa në të dytën, ata duhet të qëndrojnë deri në përfundim të procedurave për azil. Të dy kampet parashikohet të jenë nën juridiksionin italian dhe ndërtimi dhe funksionimi i tyre do mbulohet financiarisht nga pala italiane.
Marrëveshja parashikon sjelljen në Shqipëri të 3 mijë refugjatëve në muaj, 36 mijë refugjatëve në vit, teksa është nënshkruar për 5 vite, me mundësi zgjatjen më tej me miratimin e të dy palëve.
Kampi është ndarë në disa seksione të veçanta, ku përfshihet edhe izolimi për personat që kryejnë krime apo seksioni i trajtimit procedurial para se të jepet apo refuzohet azili. Nëse refuzohet, emigrantët riatdhesohen në vendet e tyre.
