Shpërndarja dhe shitja e informacioneve sekrete shtetërore, nga Jurgis Çyrbja, gjatë kohës kur ka mbajtur detyrën e deputetit të Kuvendit të Shqipërisë dhe anëtarit të Komisionit të Sigurisë, ka sjellë arrestimin e funksjonarit publik dhe izolimin e tij në paraburgimin e Durrësit.
Përmes bisedave në aplikacionin “Sky Ecc”, Jurgis Çyrbja ka biseduar me personin Altin Hajri, i shpallur në kërkim për rrëmbimin e Jan Prengës në Shijak, duke e informuar Hajrin për një seri planesh operacionale të Policisë së Shtetit, me qëllim kapjen e Altin Hajrit.
Këto informacione Jurgis Çyrbja, i merte nga punonjës policie.
Ndaj që pak ditë më parë një prokuror i SPAK, i është drejtuar me një kërkesë Drejtorisë Vendore Durrës dhe Policisë së Shtetit, për t’i vënë në dispozicion çdo plan operacional apo informacion që kanë mbledhur për në rrugë operative me qëllim lokalizimin dhe arrestimin e Altin Hajrit.
“Ora News” ka mësuar se qëllimi i kësaj “gjuetie” të nisur nga SPAK, është për të mësuar emrat e punonjësve që kanë hartuar këto plane operacionale dhe policëve që kanë pasur akses në këto informacione, që më pas ia ka dërguar deputetit të asaj kohe Jurgis Çyrbja.
Dhe ky i fundit ia ka nisur më tej personit në kërkim Altin Hajri në mënyrë që ky i fundit të merrte masa me qëllim fshehjen e tij për të mos u kapur nga policia, që shkonte në Shijak dhe Durrës për ta kapur.
