Elbasani dhe Partizani u ndanë në barazim 1-1 në sfidën e vlefshme për javën e nëntë të Superiores. Një ndeshje e luajtur në “Elbasan Arena”, që pati shumë polemika për gjykimin nga kryesori Florjan Lata.
Pas ndeshjes Klajdi Kola duke bërë moviolën e dy rasteve të fundit, që ishin më të diskutueshmet, u shpreh se Lata ka gabuar në të dyja aksionet për mënyrën si janë interpretuar rastet.
Një moviolë më e veçantë se herët e kaluara, pasi Klajdi Kola ishte vëzhguesi i gjyqtarëve, për këtë ndeshje.
“Ky moment shumë i diskutueshëm, për faktin e momentit të vërshëllimës të gjyqtarit, më përpara se duhet, sepse që në qershor në Europian ka ardhur udhëzim nga UEFA dhe FIFA, që të tilla raste kur kemi tërheqje të njëkohësishme nga ana e mbrojtësit dhe sulmuesit, kemi të bëjmë me faull në favor të mbrojtjes. Këtu gjyqtari Lata gjykoj duhet të lejonte lojën deri në fundin e aksionit, të shënohej goli, dhe më pas të vërshëllente, që të kishim kontroll nga ana e dhomës së teknologjisë. Por duket qartë tërheqja nga ana e sulmuesit që në fillim të zonës dhe deri në fund, kur bën pasimin e fundit. Vendimi i gjyqtarit për faull është i drejtë, pra nuk mund të quajmë gol të shënuar apo të anuluar sepse është vërshëllyer para se topi të hynte në rrjetë.
Kemi pretendim për penallti në fundin e takimit, minuta 90+4. Për të qenë korrekt me anën teknike, të dy futbollistët shkojnë për të luajtur me topin. Futbollisti i Elbasanit shkel topin dhe më pas fut këmbën në mesin e këmbëve të mbrojtësit të kuq. Nuk bëhet fjalë për dëmtim, bëhet fjalë për pengim nga mbrojtësi apo faullin e shkakton sulmuesi. Gjykoj që është sulmuesi që ka futur këmbët në mesin e këmbëve të kundërshtarit dhe shkakton faull në favor të mbrojtjes. Këtu gjyqtari nuk duhet ta vazhdonte lojën, siç ka bërë, por duhet të akordonte faull në favor të skuadrës së Partizanit. Nuk kemi të bëjmë me penallti, por faull në sulm“, u shpreh Klajdi Kola për RTSH.
