Nga Basir Çollaku
Zgjedhjet parlamentare do të zhvillohen në diçka më tepër se gjashtë muaj. Pak ditë më parë kreu i PD, lideri i opozitës, Sali Berisha, përcolli një mesazh të qartë për strukturat. Përballuni kudo me mazhorancën. Në debate e emisione, rrjete sociale, mos mungoni kundër socialistëve. Shmangni opozitën e opozitës. Me të drejtë duke mos ngjizur lëndë të re krize të brendshme.
Aksioni dhe interesat politike brenda PD, duhet të kenë kryeprioritet lirimin e Berishës. Askush veç tij në opozitë aktualisht, nuk ka këllqe të liderit të përballet me Edi Ramën. Veshja e bluzeje free Berisha në protesta apo ekrane nuk mjafton si shenjë devotshmërie. As si tregues se me kaq janë aksionerët e listës së sigurtë.
Ka sevdallinj të sheqerosur pranë Doktorit që besojnë se janë ata “Doktorë”. Komedi mendore e importuar. Këtu në harkun opozitar kanë hise edhe flirtet me pushtetin e Edi Ramës. Mbase ngaqë ai njeh edhe sekretet e tyre. Dhe nuk është vetëm ai. Ai i sajdis me majmëri ekonomie. Me garanci mostrazimi nga SPAK-u. Me lënie në harresë çështjeve të vjetra.
Me premtime pushteti se nuk do të dalin historitë e Sky-Enchochat nëse shfaqen emra opozitarësh. Pavarësisht se francezët, belgët, hollandezët, mendojnë, besojnë e veprojnë krejtësisht ndryshe. Ka qëlluar “ters” se nuk marrin as para në këmbim të mbylljes së ndonjë fashikulli.
Berisha dhe forumet drejtuese të PD, duhet të kërkojnë për kandidatët 2025, të mos jenë të pandehur të 2026 për shkak të fshehjes së akteve të paligjshme të konsumuara.
Askush nuk duhet të jetë peng sekretesh. Të asnjë lloji. As të vjetra apo të reja. Ata kërkues karriere, duhet të mbrojnë PD dhe jo të përdorin PD si mburojë nesër. Berisha është treguesi dhe drejtuesi se si e mbrojti PD nga asgjësimi, përballë Mafias kombëtare dhe jo vetëm. Por qëllon shpesh që fëmijët politikë, e shesin lirë shtëpinë e babait politik. E vërteta nxjerr lakuriq çdo pushtet, sado fuqi e financa të ketë.
Opozita ka potencial të madh të fitojë zgjedhjet parlamentare. Ajo ka cilësi ta mundë e shpartallojë Edi Ramën. Ka ofertë besimi. Ka program dukshëm më të mirë se kundërshtarët. Kjo është shpëtuese për Shqipërinë. Demokratët dhe shqiptarët budallenj janë mbaruar me kohë. Nuk prodhohen më..
