Seksioni i imigracionit në gjykatën e Romës ka dalë me vendimin këtë të premte (18 tetor) se të 12 refugjatët afrikanë që u sollën nga Italia në kampin e Gjadërit në Lezhë duhet të kthehen menjëherë në Itali. Ky vendim është marrë pavarësisht se kërkesa e tyre për azil ishte refuzuar nga Komisionet territoriale.
Me vendimin e sotëm, gjyqtarët e Romës nuk e kanë konfirmuar ndalimin e të 12 emigrantëve nga Egjipti dhe Bangladeshi, të shpëtuar dhe të kapur më 13 tetor nga Guardia di Finanza në ujërat ndërkombëtare të zonës SAR italiane dhe që u sollën në Gjadër.
Sipas mediave italiane, ky vendim i Gjykatës së Romës bazohet në një vendim të Gjykatës së Drejtësisë Evropiane më 4 tetor për azil kërkuesit e vendeve të pasigurta. Sipas vendimit të Gjykatës së Romës, Egjipti dhe Bangladeshi konsiderohen vende të pasigurta dhe për këtë arsye emigrantët duhet të qëndrojnë në Itali.
“Dy vendet nga vijnë emigrantët, Bangladeshi dhe Egjipti, nuk janë të sigurta, edhe në dritën e vendimit të Gjykatës së Drejtësisë” – ka sqaruar një nga gjyqtarët e seksionit të emigracionit në gjykatën e Romës në urdhrin e tij.
Ndalimi nuk u vërtetua për asnjë nga 12 emigrantët. Për gjyqtarët, gjendja e lirisë mund të rikthehet vetëm në Itali dhe për këtë arsye ata do të duhet të kthehen urgjent aty.
“Mohimi i vlefshmërisë së paraburgimeve në strukturat dhe zonat shqiptare, të barasvlershme me zonat kufitare apo tranzite italiane, vjen për shkak të pamundësisë së njohjes si “vende të sigurta” të shteteve të origjinës së personave të ndaluar, me pasojë, moszbatimi i procedurës kufitare dhe, siç parashikohet në protokoll, i transferimit jashtë territorit shqiptar të personave migrantë, të cilët kanë të drejtë të çohen në Itali” – thanë gjyqtarët.
Dy ditë më parë, anija e marinës italiane solli në total 16 refugjatë afrikanë të kapur në ujërat ndërkombëtarë, por 4 prej tyre u rikthyen sërish në Itali për shkak se dy ishin minorenë dhe dy të tjerë kishin probleme shëndetësore.
Fillimisht refugjatëtu vendosen në kampin pritës në Shëngjin dhe pas procedurave u transferuan drejt Gjadrit. Aktualisht në kampin e pritjes në Shëngjin janë gati vetëm 400 nga 880 vende.
Marrëveshja Rama-Meloni parashikon strehimin në dy kampet në Shëngjin dhe Gjadër, të refugjatëve burra dhe të rinj (pasi gratë dhe të miturit qëndrojnë në Itali) nga vendet afrikane që kapen në ujërat ndërkombëtare nga autoritetet italiane.
Në kampin e parë pritet të bëhet verifikimi i të dhënave personale të refugjatëve, ndërsa në të dytën, ata duhet të qëndrojnë deri në përfundim të procedurave për azil. Të dy kampet parashikohet të jenë nën juridiksionin italian dhe ndërtimi dhe funksionimi i tyre do mbulohet financiarisht nga pala italiane.
Marrëveshja parashikon sjelljen në Shqipëri të 3 mijë refugjatëve në muaj, 36 mijë refugjatëve në vit, teksa është nënshkruar për 5 vite, me mundësi zgjatjen më tej me miratimin e të dy palëve.
Kampi është ndarë në disa seksione të veçanta, ku përfshihet edhe izolimi për personat që kryejnë krime apo seksioni i trajtimit procedurial para se të jepet apo refuzohet azili. Nëse refuzohet, emigrantët riatdhesohen në vendet e tyre.
