Kryetarja e Komisionit hetimor për koncesionet në Shëndetësi, Albana Vokshi i është përgjigjur akuzave të mazhorancës për zvarritje të qëllimshme të këtij komisioni. E ftuar në A2 CNN, ajo tha se komisioni nuk mund të mbyllet brenda afateve që është 22 tetor, pasi sipas saj janë 20 dëshmitarë të rëndësishëm që nuk janë dëgjuar ende. Sipas saj ligji e ka përcaktuar shtyrjen e komisionit hetimor në rast se nuk janë ezaurohen afatet.
“Të dëgjosh Petro Koçin dhe Plarent Ndrecën që të pretendojnë që duan ta çojnë deri në fund këtë komision kur ka mbetur vetëm një ditë praktikisht, kur kemi 20 dëshmitarë minimalisht dhe janë dëshmitarët më të rëndësishëm. Sikur të rrinë 24 orë këta që bëjnë si të dashuruar pas afateve, ndërkohë që komisioni hetimor mund të shtyhet. Ligji e thotë qartë që nëse nuk ezaurohet e gjithë procedura dhe nuk ka pasur kohë të mjaftueshme për të marrë në dëgjesë të gjithë dëshmitarët e dakordësuar, nëse nuk janë marrë të gjitha provat dhe faktet komisioni mund të shtyhet dy apo tre herë”, tha Vokshi.
Akuzave të Petro Koçit se Albana Vokshi qëllimisht po zvarrit punën për të krijuar alibi për mazhorancën, ajo iu përgjigj se kjo ka qen ë kauza e saj dhe nuk mund të dështojë.
“Qëllimisht mazhoranca do ta dështojë. Ne e kemi kërkuar një komision që ne kemi bërë luftë për ta patur. Kemi protestuar 5-6 muaj. Unë e kam pasur një nga kauzat e mia dhe kam mbi 10 vjet që jam përkushtuar për ndjekjen e këtyre dy koncesioneve dhe janë të dy abuzivë dhe korruptivë për jetën e shëndetin. Ndreca avokat i sterilizimit dhe të pretendosh që do të bësh hetim për sterilizimin që Rama thotë se është sukses, a ka shqiptar që e beson këtë?“, u shpreh Vokshi.
Ajo akuzoi Plarent Ndrecën se ka rrëmbyer drejtimin e komisionit hetimor, ndërsa përsërit se do t’i hiqet mikrofoni sa herë që ofendon opozitën.
“Ne kemi kërkuar përjashtimin e Plarent Ndrecës dhe Klevis Xhoxhit. Ku ka ndodhur që të rrëmbehen drejtimi i komisionit. Në prezencë të kryetarit Plarent Ndreca rrëmben edhe drejtimin e komisionit hetimor. Nëse ai do të thotë që jeni rrugaçë një mijë herë do t’i hiqet mikrofoni”.
Mazhoranca vijoi me mbledhjet e Komisionit Hetimor, ndonëse në salle nuk ishte asnjë nga deputetët e opozitës që kanë edhe drejtimin e tij. Nënkryetari Plarent Ndreca nënvizoi nevojën për të gjetur një balancë mes kërkesave të opozitës dhe respektimit të afatit që ka komisioni për të mbyllur hetimin.
