Analisti Genc Burimi ka komentuar zhvillimet e sotme në kuvendin e Shqipërisë, ku një polic i nxorri dhe armën deputetit Luan Baçi.
I ftuar në Syri TV, Burimi u shpreh se nuk duhet harruar objektivi kryesor i opozitës, që është qeveria teknike. Sipas analistit, kjo që ndodhi sot në Kuvend, tregon pikërisht atë që thotë opozita, që me Edi Ramën nuk shkohet në zgjedhje.
“Shteti ka monopolin e dhunës së ligjshme për të mbrojtur të korruptuarit në pushtet. Një shtet diktaturë nuk është thjeshtë një diktaturë që të pengon lirinë e fjalës, një shtet mafioz është diktaturë. Është një shtet që vërtete e përdor policinë, siç e përdor mafia forcat e saj të mbrojtes dhe kjo nën petkun e diçkaje ligjore dhe nuk duhet të habisë askënd.
Nuk dua që as tek opinioni kombëtar dhe ai ndërkombëtar nuk duhet të harrohet kryesorja, që kjo opozitë është në këmbë sepse kërkon kësaj here zgjedhje të pastra, të rregullta të ndershme në mënyrë që skena të tilla të mos shihen më.
Kjo opozitë në këtë rast kërkon një qeveri teknike. Ky është thelbi. Finishi është që në zgjedhje nuk shkohet me Edi Ramën.
Nuk shkohet në zgjedhje me këtë bandë. Tani mësova se do të shkohet për protestë në Strasburg. Dhe Rama këtë do, që opozita të merret jo, ishte spraj, jo ishte pistoletë. Mediat e Ramës sot me këtë merren.
Edhe njëherë sot, duket se këtë qeveri nuk shkohet në zgjedhje, këto manifestime nuk u bënë që të provokohet policia, por sepse kjo opozitë sot nuk ka më besim që mund të bëhen zgjedhje të lira.
A gjendet zgjidhje, ta gjejë Brukseli, Strasburgu. Kjo të bëhet më e madhe që të shkohet tek ideja kryesore që është qeveria teknike.
Qeveri teknike të përhershme në Kushtetutë, si në Maqedoni të Veriut, kjo përbën një bazë negociatash me ndërkombëtarët. Meqë e bëni në Shkup, bëjeni dhe në Tiranë“, tha Genc Burimi.
