Çudirat nga futbolli shqiptar vijojnë, teksa më e fundit do të vijë këtë fundjavë me rikthimin e Superiores pas pauzës së kombëtareve.
Pasi u përfol për disa ditë, tashmë është zyrtare, derbi i kryeqytetit midis Tiranës dhe Dinamos do të luhet në qytetin e Vlorës.
Një gjë e tillë nuk ka ndodhur kurrë në futbollin shqiptar, me derbin e kryeqytetit që kësaj radhe zbret në jug-perëndim të vendit, rreth 154 kilometra larg kryeqytetit.
FSHF ka vendosur të mbyllë “Air Albania” për klubet, për të mbajtur në gjendje të mirë fushën për Kombëtaren, e cila luan më 16 dhe 19 nëntor në Ligën e Kombeve.
Nga ana tjetër “Selman Stërmasi” nuk i përmbush kushtet, ndërsa prej kohësh është kthyer në fushë koncertesh.
Bardheblutë kanë kërkuar “Air Albania”-n, duke pranuar të paguanin edhe 11 mijë eurot, por zyrtarisht nga FSHF-ja i është konfirmuar se fusha është në gjendje të keqe dhe do të mbillet, për të qenë gati për takimet e nëntorit të ekipit kombëtar.
Tiranës i është kyçur edhe “Elbasan Arena”, me argumentin se është mbjellë fusha. E njëjta histori si në Durrës dhe Korçë.
Derbi Tirana-Dinamo prodhon një tjetër rekord për “Guinness” dhe një turp më vete ndërsa prej kohësh futbolli shqiptar ka humbur tifozët në stadiume ndërsa një lëvizje e tillë nga FSHF zbeh më shumë bukurinë e derbit duke ulur në maksimum interesin për ndeshjen.
