Prokuroria e Durrësit ka lëshuar 7 urdhër-arreste, të miratuara nga Gjykata për biznesmenë ndërtimi, ku 4 prej të cilëve iu është caktuar masa e sigurisë “arrest me burg” dhe 3 të tjerë “arrest në shtëpi:”.
Sipas organit të akuzës, 4 biznesmenët e ndërtimit me “arrest me burg”, të cilët drejtojnë biznese në Fushë Krujë, akuzohen se nëpërmjet një skeme mashtrimi me TVSH i kanë shkaktuar dëm shtetit në vlerën mbi 127 milion lekë të reja, ku përfshiheshin të paktën gjashtë subjekte që operonin në fushën e ndërtimit.
“Grupi hetimor, nën drejtimin e Prokurorisë, ka verifikuar shitjet e subjektit “R S”, i cili ka vetëdeklaruar në vlerë total shitjeje prej 286,301,702 lekësh për periudhën Dhjetor 2023 dhe subjektit “L”, që ka vetëdeklaruar një total shitje 162,302,300 lekë gjatë Dhjetorit të vitit 2023. Në total, këto subjekte kanë kryer shitje që përllogaritet në 448,604,002 lekë, vlera për të cilat Prokuroria dyshon të jenë fiktive dhe janë faturuar te subjektet që operojnë në fushën e ndërtimit “3D C” dhe I.V FP.
Administrata tatimore ka kryer verifikimin e faturave të deklaruara, shitjet totale, historikun e punësimit të shoqërive të ndërtimit dhe marrëdhëniet me bizneset e tjera. Nga analizimi i të dhënave të deklaruara si shitjet totale për çdo subjekt, është kryer llogaritja e tatimit mbi vlerën e shtuar si dhe Tatimi Fitimi për çdo subjekti, dhe ka rezultuar në total një dëm i shkaktuar ndaj shtetit në vlerën 127,551,874 lekë.” – thuhet në njoftimin e Prokurorisë së Durrësit.
Gjithashtu, bëhet me dije se grupet hetimore kanë kryer dhe verifikimet e pajisjeve dhe automjeteve që zotëronin shoqëritë e ndërtimit nga ku ka rezultuar se subjekti “3D C” kishte në pronësi vetëm automjete luksoze, Mercedes benz AMG 63, Mercedes benz AMG GT 43, PorscheCayenne, Land Rover apo BMW X5. Asnjë prej këtyre automjeteve nuk përdoret për aktivitetin e ndërtimit.
Ende nuk dihen identietet e biznesmenëve për të cilët janë lëshuar urdhër-arrestet dhe nëse janë ekzektutuar masat e sigurisë apo jo.
