Një shqiptar të cilit i ishte refuzuar kërkesa për azil në Britani të Madhe dhe kishte mbetur rrugëve të Londrësr, u dërgua në Welshpool dhe i thanë se do të vritej nëse do të largohej nga një fermë kanabisi në qendër të qytetit.
Bëhet fjalë për 27-vjeçarin Kastriot Gega, i cili u hodh nga dritarja e katit të sipërm të ish-zyrës së County Times për t’i shpëtuar policisë kur oficerët bastisën ndërtesën trekatëshe dhe gjetën 157 bimë kanabisi më 3 shtator. Gega u gjet më vonë nga policia në çatinë e një prone ngjitur.
Vlera e mundshme e drogës shkonte mes 54,950 dhe 164,850 paund. Shtetasi shqiptar u burgos për gjashtë muaj pasi u deklarua fajtor për prodhimin e drogës së klasit B midis 19 gushtit dhe 3 shtatorit.
Ai kishte thënë në një seancë të mëparshme gjyqësore se “nuk ishte në dijeni të pasojave të punës së tij”.
Prokurorja Amy Edwards i tha gjykatës se dy javë përpara se Gega të arrestohej, ai ishte takuar me një shqiptar në Londër, i cili e çoi në mes të Uellsit.
Më pas Gega u vendos brenda pronës për të ujitur bimët e kanabisit, por pretendoi se nuk e dinte se për çfarë ishin aty dhe i tha se do të vritej nëse do të largohej nga ndërtesa.
Matthew Dunford, duke u mbrojtur, tha se kishte një “shkallë detyrimi” kur Gega, i cili kishte përfunduar i pastrehë në rrugët e Londrës, u dërgua në Welshpool nga një shqiptar për t’u bërë kultivues për rritjen e kanabisit.
Z. Dunford i tha gjyqtarit se prioriteti i Gegës ishte të kthehej në Shqipëri sa më shpejt të jetë e mundur, sepse ai ka anëtarë të sëmurë të familjes dhe dëshiron të jetë në gjendje t’i dhurojë një veshkë vëllait të tij.
Duke e dënuar Gegën me gjashtë muaj burg, gjykatësja Nicola Saffman tha se 27-vjeçari, i cili nuk kishte asnjë dënim të mëparshëm dhe një kërkesë të pasuksesshme për azil për të qëndruar në MB, ishte “nën detyrim” për të punuar në Welshpool.
“Ju keni luajtur një rol më të vogël në këtë çështje. Ju punonit në një funksion të kufizuar nën drejtimin e të tjerëve në zinxhir. Kishte një element të qartë detyrimi.” – tha gjyqtarja.
Gega do të kryejë deri në tre muaj dënimin në paraburgim. Gjykatësja Saffman shtoi: “Ju do të ktheheni në vendin tuaj. Kjo është çështje e qeverisë, jo e gjykatës.”
Të gjitha bimët e kanabisit dhe paratë kesh që u gjetën në vendngjarje u urdhëruan nga gjyqtari të konfiskohen dhe asgjësohen.
