Ndihmësi ligjor pranë Gjykatës Administrative të Apelit, Jurgen Selimi u konfirmua në detyrë të enjten më 10 tetor pas një seance dëgjimore të shkurtër, kur përmes përfaqësueses së tij ligjore, ai dha shpjegime të përmbledhura para Komisionit të Pavarur të Kualifikimit, KPK, për gjetje në kriterin e pasurisë. Ai mori vlerësim pozitiv për pastërtinë e figurës dhe profesionalizmin.
Procesi i vetingut për Selimin u krye nga trupa e KPK e kryesuar prej Firdes Shulit, me relator Lulzim Hamitajn dhe anëtare Etleda Çiftjan. Në cilësinë e vëzhguesit ndërkombëtar ishte i pranishëm Francesco Ciardi.
Jurgen Selimi është emëruar në vitin 2016 në detyrën e ndihmësit ligjor pranë Gjykatës Administrative të Apelit, ku dhe vijon ta ushtrojë detyrën. Relatori Hamitaj konstatoi se subjekti ka rezultuar në pamundësi financiare për blerjen e një automjeti për çmimin 3200 euro – pasurinë e vetme që ai dhe bashkëshortja kanë deklaruar se zotërojnë.
Nga analiza financiare e shtrirë deri në vitin 2010, Komisioni ka gjetur një pamundësi në shumën 1.2 milionë lekë. Hamitaj sqaroi në seancë se për këtë pamundësi, subjektit nuk i ishte kaluar barrë prove.
Në vijim, Hamitaj evidentoi mosdeklarimin e dy llogarive rrjedhëse të subjektit dhe bashkëshortes, ku janë depozituar pagat e tyre. Megjithatë, nga kontrolli nuk janë gjetur probleme për këto llogari bankare.
Avokatja e subjektit, nënvizoi në fillim të parashtrimeve faktin se Selimi nuk ka qenë dhe nuk është ende subjekt deklarues, ndërkohë që hetimi është shtrirë që prej vitit 2010, shumë kohë para se ai të fillonte ushtrimin e detyrës. Sipas saj, është e pamundur të bëhen krahasime, në kushtet që subjekti nuk ka deklaruar periodikisht pasuritë, shpenzimet dhe të ardhurat.
Në vijim mbrojtja theksoi se KPK nuk ka konsideruar ndryshimet e likujditeteve dhe se nga analiza rezulton se subjekti ka pasur mundësi financiare. Po ashtu, u kërkua që të korrektohet analiza financiare, pasi ka pasur konsiderim më shumë se një herë të të njëjtit shpenzim.
Për llogaritë rrjedhëse të konstatuara si të padeklaruara, avokatja e subjektit solli në vëmendje se Selimi ka bashkëngjitur në deklaratën veting listën e veprimeve bankare.
Në përfundim, Selimi kërko konfirmimin në detyrë. Pasi u tërhoq për rreth gjysmë ore, Komisioni vendosi në mënyrë unanime të konfirmojë në detyrë ndihmësin ligjor, Jurgen Selimi./Reporter.al
