Deputetja demokrate, Dhurata Çupi thotë se dhuna dhe presioni që po i bëhet opozitës duke e bllokuar për të ushtruar të drejtën e saj të opozitarizmit është një arsye e fortë për të reaguar, siç bëri së fundmi me djegien e karrigeve përpara oborrit të Kuvendit.
Në një intervistë për Syri Tv, Çupi tha se opozita nuk trembet përballë presioneve të qeverisë, me kallëzime në SPAK dhe përjashtime nga jeta parlamentare.
Një nga mbështetëset më të fuqishme të Reformës në Drejtësi, aso kohe edhe nënkryetare e ‘Ligjeve’, Çupi shprehu zhgënjimin për një reformë që sipas saj është kthyer në gjueti shtrigash për deputetët dhe liderët e opozitës.
Për Çupin është e papranueshme që një drejtësi selektive dënon deputetin Salianji dhe hap dosje penale për liderët e opozitës, në veçanti ndaj kryedemokratit Sali Berisha, për të cilin tha se hetimi ndaj tij është farsë dhe i stisur.
Sipas Çupit të gjitha pushtetet sot janë nën ‘hyqmin’ e Edi Ramës, ndërsa tha se asgjë nuk ka vlerë përballë abuzimeve dhe korrupsionit të pushtetit të Ramës.
Protesta e 7 Tetorit për deputeten demokrate është një arsye e fortë për t’u ngritur gjithësecili prej nesh, që që e ndjen veten të dhunuar, grabitur e varfëruar nga kjo qeveri.
“S’na tremb presioni i qeverisë, masat dhe presionin që ndjekin ndaj deputetëve të opozitës. Ne besojmë që kemi të drejtë, dhe arrestimi i Salianjit dhe hetimet penale ndaj drejtuesve të opozitës, na japin të drejtë të protestojmë me të gjitha format në jetën e parlamentarizmit.
Kemi denoncuar e protestuar, por arrestimi dhe dënimi penal i Salianjit, s’mund të linte grupin parlamentar pa reaguar. Ne kemi një pushtet përballë të dhunshëm, që s’ka respekt për opozitën. Kishim 6 muaj që protestonim për të drejtat tona, për ngritjen e komisioneve hetimore dhe ata morën masa duke përjashtuar deputetët. S’kishte ndodhur kurrë një gjë e tillë, apo edhe denoncimi në SPAK për disa kolegë. I kemi të parashikuara se vetëm në këtë formë qëndrojnë në pushtet dhe ne do të na kenë përballë. S’është proporcionale vlera e karriges që ne dogjëm përpara incineratorëve, korrupsionin dhe abuzimet për buxhetin e shtetit që mund të përdorej për paga e pensione. S’ka vlerë një karrige para miliona eurove të abuzimeve të pushtetit.
Bashkimi i opozitës dhe grupit parlamentar në një aksion të përbashkët, e tremb pushtetin. Kjo është diktatura, pushteti i Ramës pas 2013, i kemi të përqendruar te një individ që është Rama dhe pushtetet e tjera të dobësuar. Asnjë pushtet s’është forcuar pas 2013, vetëm Rama është forcuar. Instrumentat kontrollues, interpelancat dhe komisionet hetimore s’janë njohur nga pushteti legjislativ.
Kemi një pushtet të Ramës që kontrollon ekzekutivin, legjislativin, dhe së fundmi atë gjyqësor. Sot kemi një drejtësi që dënon një deputet dhe liderin e opozitës që e ka me masë sigurie me dosje të stisur dhe farsë. Ka rrëshqitje të parimeve të drejtësisë, për dosjen e Salianjit dhe Berishës. Është si një letër e bardhë e shkarravitur me laps të zi. E njëjta situatë dhe me liderë të tjerë të opozitës. Çdo pushtet tjetër është nën ‘hqymin’ e Edi Ramës. Vetëm opozita ka mbetur sot dhe ajo po bën beteja opozitare. Do të arrijmë ta rrëzojmë këtë pushtet që është tashmë i kalbur.
Do të na ketë përballë të gjithëve. Presionin e ka nisur me kallëzim të 23 deputetëve në SPAK. Jam në krah të opozitës dhe krah qytetarëve, nuk shkoj si hajdute dhe e korruptuas siç po bëjnë socialistët në 10 vite. Kanë shitur Shqipërinë, detin, kanë konçensionuar çdo gjë. Duhet të ngirhemi të gjithë, të majtë e të djathtë.
Ka pasur paralajmërime, kam besuar se mund të ishte drejtësi e mirë. Kemi një drejtësi që s’funksionon, kemi dosje që presin të gjykohen. Kanë frikë qytetarët t’i drejtohen gjykatës, se dosja e tyre do shqyrtohet pas një dekade. 15 vjet për të shqyrtuar një dosje, kjo është e papranueshme. Kemi hetime selektive, ndërkohë që pushteti bën namin me afera korruptive dhe abuzme me taksat e qytetarëve. Ka kryebashkiakë të kallëzuar dhe s’kemi rezultate. Kanë ikur 1 milion shqiptarë për shkak të ekonomisë, korrupsioni në nivele të larta, dhe e thonë edhe raportet. Çuditërisht ky pushtet i fiton zgjedhjet vetëm.
Ëshët protestë e të gjithë qytetarëve që janë të pakënaqur nga kjo qeveri. Është një protestë politike që thirret nga opozita dhe që ka në thelbin e saj qeverisjen teknike, zgjedhje të lira e të ndershme, një drejtësi reale dhe jo vetëm që hetohen liderit e opozitës. Është edhe një protestë ekonomie, të gjithë ata që janë nën thundrën e këtij pushteti. S’ka më vend fjala këtu. Arrogancës dhe dhunës së qeverisë, duhet t’i përgjigjemi me arrogancën qytetare, S’është tubim dhe protestë, njerëzit janë të dhunuar, vjedhur e keqtrajtuar nga kjo qeveri, të gjithë këtë mllef do ta tregojnë në protestë”, tha Cupi.
