Policia e Tiranës ka arrestuar pronarin e një biznesi për shit-blerje aparatësh telefonikë, i cili akuzohet se duke ndërhyrë në sistemet operative iOS dhe android të smartphoneve, i zhbllokonte celularët e vjedhur dhe më pas i shiste ata si në gjendjen fillestare.
Në kuadër të operacionit policor të koduar “Wiper” është vënë në pranga shtetasi Ervin Voci, 36 vjeç. Mbi të rëndojnë akuzat për veprat penale “Ndërhyrja në të dhënat kompjuterike”, “Ndërhyrja në sistemet kompjuterike”, “Keqpërdorimi i pajisjeve”, “Ndërhyrja në të dhënat e topografisë së qarkut të gjysmë përçuesit”, dhe “Shitja e paautorizuar e kartave SIM”.
“Shtetasi Ervin Voci dyshohet se nëpërmjet pajisjeve elektronike të posaçme, programeve të palicencuara, të cilat shiten në tregun e zi online, i quajtur ndryshe DarkWeb, si dhe nëpërmjet gjenerimit të numrave të telefonit të shteteve të ndryshme, nga programe specifike online, ka ndërhyrë në të dhënat kompjuterike të sistemeve operative të aparateve celularë. Kështu, ky shtetas ka arritur që të thyejë elementët e sigurisë të tyre, dhe më pas ka marrë në posedim të dhënat kompjuterike, të përdoruesve të mëparshëm dhe kthimin në gjendje fillestare të smartphoneve me qëllim shitjen e tyre.” – thuhet në njoftimin e bluve të kryeqytetit.
Policia raporton se deri tani janë dokumentuar me prova ligjore 473 përvetësime të fjalëkalimeve të ndryshme, teksa vijon puna për identifikimin e personave të tjerë, të implikuar në këtë veprimtari kriminale.
Materialet i kaluan Prokurorisë së Tiranës për veprime të mëtejshme.
