Nga Boldnews.al
Tre ditë pasi hodhi në treg idenë “e çmendur” për krijimin e “Shtetit Bektashi” në një pjesë të Tiranës, kryeministri Edi Rama dha sinjalin e parë të tërheqjes, pas reagimit vendas, por, me shumë mundësi, pas “tërheqjes së veshit” nga faktorë ndërkombëtarë.
Rama shpërndau një postim në rrjete sociale, ku, u shpreh, ndër të tjera se: “…nga ideja tek jetësimi i saj ka një kohë të tërë për t’u kthjelluar çdo gjë dhe një proces të tërë publik e legjislativ për t’u zhvilluar…”.
I gjithë ky zhvillim i vrullshëm pak ditor, e vendos Ramën në një lloj personazhi të ngjashëm me fabulën e Ezopit, “Shqiponja dhe sorra”.
Dikur, një shqiponjë u sul me shpejtësi dhe kapi një qengj. E pa sorra, u zileps dhe veproi si shqiponja. U vërsul mbi një dash, por i mbetën thonjtë tek leshi. E kapi bariu sorrën, e mori në shtëpi. Fëmijët e pyetën se çfarë ishte ai shpend: “Është një sorrë, që i duket vetja si shqiponjë”.
Kryeministri shqiptar, mesa duket, tentoi të bëhej një “shqiponjë”, por, me pak lëvizje diplomatike, u rikthye në pozicionin natyror të “sorrës” në arenën ndërkombëtare.
Megjithatë, Rama nuk është nga ata tipa që e pranon lehtësisht humbjen apo kthimin e hapave pas. Edhe kur është i detyruar ta bëjë këtë gjë, do ta mbulojë medoemos me shashka të tjera politike, diplomatike, historike apo estetike.
Deklaratën e të Mërkurës që shkoi (25 shtator 2025), Rama e shoqëroi me një foto të rilindasit të madh kombëtar, Naim Frashëri, duke evokuar në këtë mënyrë faktin se poeti ka qenë bektashi dhe pasardhësit e të njëjtit kah fetar meritojnë, gjithësesi, të kenë një entit sovran.
Rama nuk është naiv, nuk është as i palexuar. Ai e njeh historinë dhe e di që Naim Frashëri nuk ka asnjë gjurmë në veprën e tij, ku të lihet të kuptohet se “ishte patriot se ishte bektashi”.
As bektashinj të tjerë të shquar, të cilët kanë dhënë kontribut të rëndësishëm në pavarësinë, shtet-formimin dhe çlirimin e Shqipërisë, nuk rezulton të kenë thënë se “jam patriot, se jam bektashi”. Ashtu siç, asnjë klerik dhe përfaqësues i feve të tjera, me kontribute në jetën politike dhe publike shqiptare, nuk e ka lidhur patriotizmin me fenë.
Ndaj, lidhja që Rama i bën bektashizmit me Rilindjen, si rrjedhojë vetëm e besimit fetar, është një tjetër thagmë, një tjetër gafë, për të cilën ka dhënë një përgjigje udhëtarja e famshme britanike, Edit Durham në atë kohë kur, jo Edi Rama që nuk kishte lindur, por as babai i tij, një nga kazmë-vënësit e besimit fetar në Shqipëri, Kristaqi, ende nuk e kishte parë dritën e diellit.
Në botimin “Brenga e Ballkanit”, botuar në vitin 1905, miss Edit Durman, shkruante:
“… Kur kaloja nëpër Ballkan, në Rumeli pyesja njerëzit: «Ç’je ti?»- Katolik – përgjigjej njëri.- Protestant – përgjigjej tjetri. Në Bullgari pyesja: «Ç’je ti?»- Ortodoks.
Në Serbi pyesja: «Ç’je ti?»- Protestant.- Ortodoks…. Kështu e mbytur e tëra nga dogmat idiote të njerëzve, duke hyrë në Shqipëri pyeta: «Çfarë jeni ju këtu?»- Shqiptarë – m’u përgjigjën prerë e qartë. «Më në fund», thashë, «u çlirova këtu nga fanatikët dhe zotkrijuesit…”.
Durhami, 120 vjet më parë, e ka thënë qartë se patriotizmi shqiptar nuk është si pasojë e besimit. Është thjesht vetëdije shqiptare, e cila fenë e ka pasur si mbështetëse të vyer, por jo si bazë për identitetin kombëtar, siç, sot, po lë të kuptohet kryeministri Edi Rama.
Shteti Bektashi/ Në shtetin privat të Ramës, çdo çmenduri e tij bëhet realitet
