Gjykata e Tiranës ka caktuar këtë të shtunë masën e sigurisë “arrest me burg” për 26-vjeçarin Shkëlqim Saraçi, i cili u arrestua tre ditë më parë në kuadër të operacionit policor të koduar “Apps”.
Ai u kap në flagrancë duke i marrë 20 mijë euro një biznesmeni duke iu prezantuar si funksionar i lartë shtetëror.
Burime bëjnë me dije se mashtruesit dhe biznesmeni, identiteti i të cilit ende nuk dihet, kishin biseduar në aplikacionin “Signal”, ku mësohet se mashtruesi ishte hequr sikur ishte kryetari i Bashkisë së Tiranës, Erion Veliaj.
Biznesmenit i janë kërkuar 50 mijë euro në emër të Erion Veliajt. Ai ka bërë kallëzim në Policinë e Tiranës dhe ka bashkëpunuar me krimin ekonomik. Nën këshillën e bluve biznesmeni u ka thënë se ka vetëm 20 mijë duke rënë edhe në dakordësi. Më pas ata kanë lënë takim dhe e kanë kapur Shkëlqim Saraçin në flagrancë në momentin e marrjes së 20 mijë eurove.
Policia e Tiranës shpalli në kërkim dhe organizatorin e dyshuar të këtij rasti, shtetasi L. D., 24 vjeç. Sipas bluve të kryeqytetit, shtetasi L. D., organizatori i skemës së mashtrimit, nga verifikimet rezulton se ndodhet jashtë shtetit.
Bashkë me Shkëlqim Saraçin, ata akuzohen për kryerjen e veprave penale “Mashtrimi”, me pasoja të rënda, dhe “Përvetësimi i titullit apo detyrës shtetërore”.
