Gjykata e Lartë ka prishur vendimin e Gjykatës së Posaçme të Apelit për lënien në fuqi të masave të sigurisë “Arrest me burg” për Redi Molllën dhe Mariglen Qaton, dy drejtorët e Bashkisë së Tiranës së drejtuar nga Erion Veliaj.
Vendimi është marrë ditën e sotme nga trupa gjykuese e përbërë nga gjyqtarët Ilir Panda, Albana Boksi dhe Medi Bici, të cilët kanë vendosur ta dërgojnë çështjen për rishqyrtim, po nga Gjykata e Posaçme e Apelit, por me një tjetër trupë gjykuese.
Gjyqtarët sakaq nuk kanë mbajtur të njëjtin qëndrim për Taulant Tushen, i cili ka akuzë më të lehtë se dy ish-drejtorët e tjerë. Vendimi i mëparshëm i Apelit u ankimua në Gjykatë të Lartë edhe nga Tushe, Julian Zanaj dhe Eglantina Zere.
Redi Molla dhe Mariglen Qato janë burgosur nga SPAK për të ashtuquajtur dosjen “5D”, bashkë me zyrtarë të tjerë të Bashkisë së Tiranës, të cilët akuzohen se favorizuan në mënyrë të paligjshme një kompani të zotëruar “de facto” nga Molla dhe Qato, kompaninë “5D Konstruksion” duke e ushqyer atë me tendera publikë nga Bashkia e Tiranës..
Kompania e tyre, “5D Konstruksion” fitoi dhjetra tendera dhe qarkulloi mbi 20 milionë euro në gjashtë vjet.
Redi Molla ka mbajtur postin e ish-drejtorit të Ujësjellësit të Tiranës, ndërsa Mariglen Qato atë të ish-drejtuesit të Inspektoriatit të Mbrojtjes së Territorit, teksa në momentin e arrestimit mbante pozicionin e administratorit të ndërmarrjes së bashkisë së kryeqytetit, Tirana DC.
Pak ditë më parë, SPAK shtoi ndaj tyre edhe me 6 muaj të tjera afatet e hetimit, teksa iu shtoi edhe akuzën për pastrim parash.
Molla dhe Qato akuzohen për veprat penale “Korrupsioni pasiv i personave që ushtrojnë funksione publike”; “Refuzimi për deklarimin, mosdeklarimi, fshehja ose deklarimi i rreme i pasurive, interesave private të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”; si dhe “Pastrimi i produkukteve të veprës penale ose veprimtarisë kriminale” të kryer në bashkëpunim.
Edhe pse ata kishin krijuar një kompani për të përfituar para publike nga tenderimet e Bashkisë së Tiranës, sërish SPAK e la “të paprekur” kryebashkiakun Erion Veliaj, duke mos e marrë të pandehur, ashtu siç ka bërë edhe për aferën e inceneratorit.
Njoftimi i Gjykatës së Lartë:
“1. Lënien në fuqi të vendimit nr. 18 (87-2024-123), datë 03.05.2024, të Gjykatës së Posaçme të Apelit për Korrupsionin dhe Krimin e Organizuar, për personin nën hetim Taulant Tusha.
2. Prishjen e vendimit nr. 18 (87-2024-123), datë 03.05.2024, të Gjykatës së Posaçme të Apelit për Korrupsionin dhe Krimin e Organizuar për personat nën hetim Redi Molla, Mariglen Qato dhe dërgimin e çështjes për rishqyrtim në këtë gjykatë, me tjetër trup gjykues.”, thuhet në vendimin e Gjykatës.
