Ministri i Brendshëm i Kosovës, Xhelal Sveçla, ka deklaruar se aktakuza e Prokurorisë Speciale për rastin e sulmit terrorist në Banjskë, është “e vonuar dhe e paplotë”.
Ajo, sipas tij, nuk përfshin disa komandantë të ushtrisë serbe, të cilët, siç Sveçla pretendon, “kanë mundësuar trajnimin e grupit terrorist, por edhe e kanë furnizuar atë me armatimin ushtarak”, të cilin forcat e sigurisë së Kosovës e kanë sekuestruar në Banjskë, shkruan A2.
“Ne kemi dëshmi të padiskutueshme se ky grup terrorist ka mbajtur ushtrime ushtarake në Pasulanske Livade, që është një kazermë zyrtare e ushtrisë së Serbisë, ku presidenti i Serbisë, Aleksandër Vuçiç shkon pothuajse çdo muaj dhe mbikëqyr trajnime të ndryshme të pjesëtarëve të njësiteve të ndryshme të ushtrisë apo policisë”, deklaroi Sveçla.
Më 24 shtator të vitit të kaluar, grupi terrorist i drejtuar nga ish/nënkryetari i Listës Serbe, Milan Radoiçiç sulmoi policinë e Kosovës në Banjskë të Zveçanit, duke vrarë rreshterin Afrim Bunjaku.
Gjatë shkëmbimit të zjarrit me Forcat e Sigurisë së Kosovës mbetën të vrarë edhe tre terroristë serbë.
