Sekretari i Përgjithshëm i NATO-s, Mark Rutte, deklaroi se aleanca pret nga autoritetet serbe që të përcaktojnë dhe ndëshkojnë përgjegjësit për sulmin e armatosur në Banjskë dhe për dhunën ndaj trupave të KFOR-it gjatë tensioneve në Kosovë në vitin 2023.
Deklaratat Rutte i bëri gjatë një adresimi në Komitetin për Punë të Jashtme të Parlamentit Evropian (AFET), ku riafirmoi mbështetjen e NATO-s për dialogun mes Kosovës dhe Serbisë, të ndërmjetësuar nga Bashkimi Evropian.
“Kam një marrëdhënie personale me presidentin Aleksandar Vuçiq dhe e njoh prej shumë vitesh. Por presim prej tij përcaktimin e plotë të përgjegjësisë për atë që ndodhi. Për të dyja rastet është premtuar se do të ketë përgjegjësi,” u shpreh Rutte.
Ai theksoi gjithashtu se NATO-ja mbetet e përkushtuar për ruajtjen e sigurisë në Ballkanin Perëndimor dhe se nuk do të lejojë krijimin e një vakumi sigurie, veçanërisht në Bosnje dhe Hercegovinë.
Tensionet mes Kosovës dhe Serbisë u përshkallëzuan në shtator të vitit 2023, kur një grup serbësh të armatosur sulmuan Policinë e Kosovës në fshatin Banjskë të Zveçanit, duke vrarë një rreshter policie. Gjatë përleshjeve që pasuan, u vranë tre sulmues.
Përgjegjësinë për këtë sulm e mori politikani dhe biznesmeni serb Millan Radoiçiq, i cili ndodhet në Serbi dhe deri më tani nuk është ndjekur penalisht nga autoritetet atje.
