- Autoritetet kolumbiane kanë ekstraduar drejt vendit tonë 25-vjeçarin, Admir Tutaj nga Tropoja, i cili ishte shpallur në kërkim nga SPAK si pjesë e një grupi kriminal që trafikonin armë zjarri nga Shqipëria drejt Britanisë së Madhe.
25-vjeçari u arrestua në Kolumbi më 23 gusht për llogari të drejtësisë shqiptare. Tutja mbërriti në Kolumbi me autobus në Antioquia, por u ndalua në zyrat e imigracionit te aeroportit “Ernesto Cortissoz” në Barranquilla. Aty dyshohet se përpunonte dokumente me të cilat synonte të largohej jashtë vendit.
Tutaj është transferuar tashmë në aeroportin El Dorado në Bogota, me qëllim ekstradimin drejt Shqipërisë. Ai akuzohet për veprën penale “Trafikimi i armëve dhe i municionit”, kryer në kuadër të grupit të strukturuar kriminal.
Hetimet për këtë grup kriminal nisën më 10 Prill të vitit të kaluar, Policia e Durrësit sekuestroi 8 armë zjarri pistoleta të llojit “Glock” në portin e Durrësit të cilat po transportoheshin nga një furgon me targa angleze. Furgoni është ndaluar nga policia në vijën e dytë të kontrollit të terminalit të trageteve ku më pas do të imbarkohej në tragetin e linjës Durrës-Ankona. Armët ishin ambalazhuar në një kuti kartoni dhe kishin destinacion Anglinë.
Hetimet më pas u morën nga SPAK. Në atë kohë u arrestua drejtuesi i furgonit, i cili do të transportonte armët drejt Britanisë, shtetasi Jetmir Koloshi.
Në kuadër të këtij procedimi penal, pas 1 viti hetimesh, SPAK lëshoi disa urdhër-arreste të tjera. Në pranga u vunë shtetasit Adulla Hoxhaj, 44 vjeç dhe Rifat Avdiaj, 62 vjeç.
Gjatë kontrollit ë ushtruar në banesën e Adulla Hoxhaj, i cili dyshohet se është edhe kreu i grupit kriminal u zbulua një arsenal armësh. Më konkretisht 25 armë zjarri (24 pistoleta dhe 1 kallashnikov), qindra fishekë, lazera që i montohen armëve speciale dhe shërbejnë për qitje në distancë, dhe pajisje optike. Gjithashtu edhe veshje kamuflazhi si ato të forcave speciale, 4 automjete, 8 celularë, karta SIM, 2 laptopë dhe 2 thika.
Hetimi përmbi një-vjeçar i SPAK ka zbuluar se si të arrestuarit në Shqipëri i kishin detyrat të ndara. Avdulla Hoxhaj nga Tropoja në banesën e të cilit u gjetën armë të tjera dyshohet se bashkëpunonte per transportin e armëve drejt Britanisë së Madhe.
Rifat Avdiaj, është i angazhuar në një mobileri të hapur në zonën e Paskuqanit, një punishte që ofron mobilie shtëpie, por që e kishte përsosur edhe me një teknikë tjetër, atë të fshehjes së armëve e municioneve që dyshohet se nuk gjurmoheshin.
Ata porosisnin tavolina druri të gdhendura bukur, kolltukë deri edhe çifteli. Por në të vërtetë brenda tyre ishin fshehur armë që transportoheshin nga Shqipëria drejt Anglisë ku dhe priteshin nga tre shtetas shqiptarë.
