Krerët e politikës kanë reaguar për ndarjen e parakohshme nga jeta të ish-deputetit demokrat Gerti Bogdani, i cili humbi jetën në moshën 44-vjeçare pas një arresti kardiak.
Kryeministri Edi Rama ka ndarë një mesazh ngushëllimi në rrjetet sociale, ku i ka shprehur ngushëllimet bashkëshortes dhe familjes së ish-ligjvënësit demokrat.
“⚫️Keqardhje për ndarjen kaq të parakohshme nga jeta dhe ngushëllime bashkëshortes e familjes Bogdani”, – shkruan Rama.
Po ashtu edhe ish-kryedemokrati Lulzim Basha është shprehur i tronditur për ndarjen nga jeta të Gerti Bogdanit dhe shkruan se ka qenë mik dhe bashkëpunëtor i tij, ndërsa i shprehu ngushëllime familjes.
“Jam i tronditur nga lajmi për largimin e papritur e të parakohshëm nga jeta të mikut dhe bashkëpunëtorit tim Gerti Bogdani. Ngushëllimet e mia më të ndjera familjes në këto orë të vështira. Mendimet dhe lutjet e mija janë me ta në këtë dhimbje të madhe.
Një shpirt i lirë dhe i përkushtuar ndaj të tjerëve, një politikan i talentuar dhe me vlera, Gerti shërbeu me pasion dhe integritet në funksionet e tij publike, duke nderuar Partinë Demokratike me përfaqësimin dinjitoz brenda dhe jashtë vendit.
Në këtë ditë zie, kur familja ka humbur njeriun e saj më të shtrenjtë, demokratët kujtojnë me respektin më të madh modelin e intelektualit konsensual dhe njërin nga përfaqësuesit e tyre më të përkushtuar, dhe unë një mik të paharrueshëm. U prehtë në paqe!”, shkruan Basha.
Edhe presidenti i Partisë së Lirisë, Ilir Meta ka reaguar i tronditur për ndarjen nga jeta të Gerti Bogdanit, teksa sipas tij, ai krijoi një model pozitiv për të rinjtë duke i nxitur të jenë pjesë e vendimmarrjes.
“Thellësisht i trishtuar nga lajmi për ndarjen e parakohshme nga jeta të ish-deputetit të Partisë Demokratike, Gert Bogdani.
Gjatë gjithë angazhimit të tij politik, ai krijoi një model pozitiv për të rinjtë duke i nxitur të jenë pjesë e vendimmarrjes.
Ngushëllimet më të ndjera bashkëshortes Edlira, dy vajzave të tij, të afërmve dhe të gjithë bashkëpunëtorëve, për këtë humbje të pazëvendësueshme.” – shkruan Meta.
Një reagim ka ardhur edhe nga kryetarja e Kuvendit, Elisa Spiropali, shkruan se është e tronditur nga ndarja nga jeta e tij.
“Dhimbje e thellë për ndarjen nga jeta të kolegut tonë, ish-deputetit të Kuvendit të Shqipërisë, babait, bashkëshortit, birit, Gerti Bogdani. Na trondite me ikjen tënde, Gert! Ike shumë i ri, vetëm 44 vjeç!
Ngushëllime nga zemra familjes! U prehsh në paqe! Të ndrittë shpirti”, shkruan kryeparlamentarja.
Ndarja nga jeta e Gerti Bogdanit/ Berisha mban 1 minutë heshtje në konferencë: Lajm shokues!
