Kryedemokrati Sali Berisha, në mbledhjen me drejtuesit politikë të qarqeve, tha se do i japin përparësi absolute protestës.
Berisha tha se nuk pranojnë të ecin symbylltas drejt grabitjes dhe drejt funeralit të votës së lirë pa u hedhur në kuti.
“Si lider të PD në qarqet ku ju jeni ngarkuar kërkon që ju të jeni organizatorë të shkëlqyer. Kërkon që ju me ekipin lokal të riorganizoni PD.
Anëtarësia e saj ka nevojë jetike, vendimtare për jë organizim solid.
Shpesh dhe rëndomë shtrohet çështja: njerëzit janë të gatshëm, njerëzit nuk janë të gatshëm. E para, ju vetë duhet të jeni të gatshëm, dhe për të qenë ju të gatshëm, duhet të organizoni demokratët. Ata aty janë, ata presin t’i organizojnë.
Përveç organizimit, detyra juaj është t’i frymëzoni. Në qoftë se organizojmë, në qoftë se ne i frymëzojmë, unë ju garantoj ju se forcë në botë që të pengojë realizimin e qëllimeve tona objektive nuk ka dhe nuk mund të ketë.
Ka patur dhe ka një debat, po protesta dhe fushata? Jo, ne i japim përparësi absolute protestës. Ne nuk pranojmë të ecim symbylltas drejt grabitjes dhe drejt funeralit të votës së lirë pa u hedhur në kuti”, tha Berisha.
Ndër të tjera, kryetari i PD-së u shpreh se janë shpresa e fundit e shqiptarëve, ndërsa theksoi se udhëheqja e drejtuesve politikë në qarqe duhet të ecë paralelisht me debatin intensiv.
“Demokratët s’mund të jenë qytetarë të dorës së dytë, janë të klasit të parë, ndaj dhe përcjellja e këtyre mesazheve, është vendimtar për fitoren tonë”, tha ish-kryeministri.
