Banorët e zonës së Krujës, Fushë-Krujës dhe Thumanës kanë dalë sërish këtë të martë në protestë, ku kanë tentuar të bllokojnë autostradën Thumanë-Kashar, teksa nuk kanë munguar edhe përplasjet me Policinë.
Banorët e këtyre zonave kërkojnë hyrje dhe dalje në autostradën Thumanë-Kashar, ose një rrugë dytësore, pasi me rrugën e re ata nuk kanë akses për banesat dhe bizneset e tyre dhe deklarojnë se po shkojnë drejt falimentimit. Sipas banorëve, ata duhet të shkojnë deri në Rinas për t’u futur në autostradë.
Në prononcime për mediat, ata shprehen të revoltuar, teksa thonë edhe se janë dhunuar nga Policia.
“Rama dhe ministrja Balluku të na japin akses në rrugë, ministri i Brendshëm të ndalojë Policinë q ëtë mos na dhunojë.” – tha një protestues.
“Rama nuk na ndal me Policinë, ne kemi punë vetëm me Ramën, Belinda Ballukun dhe drejtorin e ARRSH, të cilët mbushin xhepat me paratë tona.” – tha një protestues tjetër.
“Më kanë rrahur, më kanë hequr nga puna, më kanë futur në burg, por unë prapë do të protestoj”, – tha një qytetar, i cili proteston për të disatën herë kundër bllokimit të rrugës, ndërsa bëri thirrje që të ketë hyrje-dalje në aksin Thumanë-Kashar.
E pranishme në protestë ishte edhe deputetje e PD-së, Andia Ulliri, e cila tha për mediat se banorët e rrethit të Krujës vijojnë ende të jenë pa përgjigje, në lidhje me projektin që i izoloi ata.
Deputetja thotë se në protestë ka pasur provokime, presione dhe gaz lotsjellës jo vetëm ndaj protestuesve, por edhe ndaj fëmijëve dhe të moshuarve.
Sipas saj, projekti ka abuzime, ndaj institucionet e drejtësisë duhet të reagojnë për të garantuar të drejtat e banorëve të rrethit Krujë.
“Jemi këtu prej dy muajsh, ne s’kemi marrë asnjë përgjigje nga institucionet, ka qenë censurë, provokime, presione e gaz lotsjellës. Këtu ka fëmijë, gra e burra, të moshuar që protestojnë për një të drejtë të tyre. I bëj thirrje institucioneve që të reagojnë, madje kam dërguar kërkesë Kuvendit. Këtu ka provokime . Ne duam zhvillim, duam jetë, s’mund ta pranojmë që ne të fshihemi nga harta. Kjo është shkelja që ka ndodhur, e të drejtave tona kushtetuese. Të na japin atë që na takon, kush e mbylli rrugën, pse nuk ka hyrje-dalje për të gjitha Bashkitë që preken nga ky projekt. Kjo rrugë nuk e ka standardin e projektuar, siç ishte planifikuar nga BE. S’është përfolur kurrë tarifa e pagesat për këtë aks, asnjë kosto apo tarifë për hyrje-dalje. Kanë fshehur projekt-zbatimin, s’është transparente. Ka abuzime, institucionet e drejtësisë të reagojnë për të garantuar të drejtat e banorëve të rrethit Krujë” – tha Andia Ulliri.
Pas përplasjes me Policinë, banorët bllokuan kryqëzimin e Thumanës, duke shkaktuar trafik kilometrik, teksa qarkullimi në autostradël vijonte normalisht.
Banorët mbeten të vendosur në kërkesat e tyre dhe kërkojnë një zgjidhje të menjëhershme nga autoritetet për t’i dhënë fund kësaj situate të vështirë.
