Është ekstraduar këtë të hënë nga Shqipëria drejt Italisë një 48-vjeçar, i dënuar me mbi 14 vjet burgim për trafikim kokaine.
Bëhet fjalë për shtetasin Armand Dani alias Armand Isaj, i lindur në Shkodër.
Sipas autoriteteve policore, Gjykata e Novarës, më datë 1 Mars të vitit 2023, e ka dënuar ketë shtetas, me 14 vjet, 8 muaj e 29 ditë burgim, për veprën penale “Trafikimi i lëndëve narkotike”.
Sipas Policisë së Shtetit, nga ky dënim, 48 vjeçarit i duhet të vuajë dhe 11 vjet, 8 muaj e 29 ditë burgim.
Nga hetimet ka rezultuar se shtetasi Armand Dani alias Armand Isaj, në bashkëpunim me të tjerë, siguronte lëndë narkotike kokainë në vende të tjera (kryesisht në Holandë), për ta shitur në Itali. Në vitin 2017, në banesën e 48-vjeçarit, Policia italiane gjeti dhe sekuestroi një sasi lënde narkotike kokainë.
