Në 4 sezonet e fundit është transmetuar në 4 televizione të ndryshme. Duket se askush nuk dëshiron ta mbajë të drejtën e tramsetimit të futbollit shqiptar.
Vetëm dy ditë larg nga nisja e Kategorisë Superiore, Federata Shqiptare e Futbollit ka njoftuar se ka lidhur kontratë për transmetimin e futbollit shqiptar me Radio Televizionin Shqiptar.
Sipas njoftimit të FSHF-së, do të transmetojë për tre sezonet e ardhshme kampionatin Kategoria Superiore, duke përfshirë edhe Final 4, Kategorinë e Parë, Kupën e Shqipërisë dhe Superkupën e Shqipërisë.
Bëhet fjalë për sezonet 2024/25; 2025/26 dhe 2026/27 të kompeticioneve kombëtare për territorin e Shqipërisë dhe Kosovës.
Kjo marrëveshje, edhe pse vjen vetëm dy ditë larg nisjes së kampionatit, po ashtu ka edhe mungesë transparence, pasi FSHF nuk bën me dije se sa do të jetë vlera që do të paguajë RTSH për të drejtën e transmetimit të futbollit shqiptar.
Gjithashtu, nuk bëhet me dije as arsyet pse u prish marrëveshja me televizionin MCN, i cili e tramsetonte sezonin e kaluar, pasi vitin e kaluar u tha po ashtu se se kontrata ishte 3-vjeçare.
Nga viti në vit stadiumet në Shqipëri po braktisen nga tifozët, teksa ekipet shqiptare dështuan edhe në arenën europiane këtë vit, duke u eliminuar që në fazat e para. Shpesh thuhet se arsyeja kryesore është mungesa e financave, teksa prej vitesh klubet janë pritje që Qeveria të mbajë premtimin e Ligjit të Sponsorizimeve.
Kampionati i Kategorisë Superiore do të ngrejë siparin e edicionit të 86-të më 18 gusht, ndërsa Kategoria e Parë do të nisë më 24 gusht.
