Pasi presidenti i PL-së Ilir Meta, e akuzoi se ka pasur një marrëveshje të fshehtë me Edi Ramën për marrëveshjen e detit, ka reaguar ish-kryedemokrati Lulzim Basha.
Përmes një postimi në Facebook, Basha shkruan se Ilir Meta është simbol i pandëshkueshmërisë dhe i pazareve në kurriz të shqiptarëve dhe demokratëve.
Më tej ai shton se Meta ka përdorur pushtetin e demokratëve për interesat e tij personale dhe për të fuqizuar Edi Ramën. Ndërsa për akuzat e presidentit të PL-së, kreu Demokratëve Euroatlantikë, i konsideron si qesharake.
Postimi Bashës:
Ilir Meta është simbol i pandëshkueshmërisë dhe i pazareve në kurriz të shqiptarëve dhe demokratëve. Njeriu me bllok në dorë që ka përdorur pushtetin e demokratëve për interesat e tij personale dhe për të fuqizuar Edi Ramën, vijon me mashtrime ordinere për të mbuluar pazaret e tij të pista.
Sot po kërkon sërish me akuza qesharake që të bejë pazarin e rradhës në kurriz të demokratëve e të përfitojë nga votat e tyre.
Pazaret, deliret dhe ankthet e tij kanë dëmtuar rëndë opozitën dhe Partinë Demokratike ndaj distancimi nga ai dhe të ngjashmit e tij janë kusht i pashmangshëm për t’u ndarë nga korrupsioni dhe për fitoren e saj.
Akuzat e Metës
Gjatë mbledhjes së Kryesisë së PL-së, Meta akuzoi Bashën se ka pasur një marrëveshje të fshehtë me Edi Ramën për marrëveshjen e detit.
“Kë njeh president kjo drejtoresha, këlyshët e Dumdumanit, Ramoviçit. Kë njeh? Në emër të kujt i bëhet kjo bllokadë partisë së tretë parlamentare. Ja bllokuan llogaritë e PL, do bllokojnë Ilir Metën. Do fshehin aferën e detit, të Lulzim Bashës dhe Ramës. Hë me Tedi, e fshehin dot po shkrimin e 28 prillit, po emailin e 27 prillit. Dumdumani kjo qenie e pështirë ka marrë njerëz peng në PL, me korrupsionin e tyre, për të ekzekutuar pluralizmin në Shqipëri”, tha Ilir Meta.
