Drejtori i Prgjithshëm i Policisë së Shtetit, Muhamet Rrumbullaku gjatë një konfernce me gazetarët ka konfirmuar arrestimin në një shtet të huaj të “ushtarit” të Emiliano Shullazit, Fabio Ballabanin alias Fabio Zyberaj alias Ivi Zyberaj.
“Mund t’iu konfirmoj edhe një fakt tjetër, edhe për ekzekutimin e vendimit për Fabio Ballabani, pjesë e grupeve të strukturuara kriminale, në një vend partner, aktualisht vuan dënimin në një burg.” – tha Rrumbullaku.
Fabio Ballabani ishte shpallur në kërkim nga SPAK në kuadër të operacionit “Revanshi” lidhur me ngjarjen e regjistruar në vitin 2019, ku me urdhër të Emiliano Shullazit kërcënoi dhe dhunoi brutalisht bashkëshortin e gjyqtares Saida Dollani, Kristaq Priftin.
Ngjarja u zbardhur pas 5 vitesh pas zbërthimit të bisedave në aplikacionin e enkriptuar “Sky Ecc”, ku rezultoi se personat të cilat urdhëruan rrahjen e burrit të Saida Dollanit, kanë qenë Emiljano Shullazi, ish-deputeti i Partisë Socialiste Arben Ndoka si dhe i shumëkërkuari Ervis Martinaj.
Porosia u krye nga Fabio Ballabani, teksa dyshohet se shkaku ka qenë që gjyqtarja Saida Dollani të tërhiqej nga çështja gjyqësore e Emiliano Shullazit.
Saida Dollani u largua nga procesi gjyqësor i Shullazit, ndërsa për rastin e kërcënimit nisën hetimet, por 10 muaj më pas prokurorja Ida Ahmetlli kërkoi pushimin e hetimeve, ndërsa gjykata e kundërshtoi duke e rikthyer për vijimin e hetimeve në 2020.
Vetë bashkëshorti i gjyqtares, Kristaq Prifti gjatë dëshmisë së dhënë në gjykatë në vitin 2019 tregoi kërcënimet që kishte marrë nga disa persona dhe se si ata i vendosën pistoletën në gojë.
“Isha në lokalin e lagjes bashkë me një mikun tim. Një moment dola të pija një cigare të dera e jashtme. Aty pranë kaloi bashkëshortja ime me një shoqen e saj dhe vajzën. Pak minuta më pas, në të djathtën time erdhi një djalë i rri, rreth 20-22 vjeç, i cili ishte veshur me bluzë ngjyrë si në të zezë, pantallona të errëta dhe atlete të bardha.
Ai erdhi direkt me pistoletë në dorë dhe vuri këmbën e majtë pas këmbës sime të djathtë. Më rrëzoi në tokë dhe më drejtoi pistoletën në gojë. Mu drejtua me fjalët ‘ti me atë tët shoqe mos harro se ke dy fëmijët në Francë’.
Në këtë moment ndërhyri shoku im, i cili e kapi nga pas personin. Ai u largua nga pjesa e djathtë e rrugës, ku e mori një automjet i bardhë, që drejtohej nga një person me mjekër. Kërcënimi në drejtimin tim ka ndodhur për shkak të funksionit të bashkëshortes time si gjyqtare në Gjykatën e Apelit për Krime të rënda”, ka dëshmuar atë kohë bashkëshorti i gjyqtares Saida Dollani.
