Edhe protestën e kësaj të marte të banorëve të Krujës, Fushë Krujës dhe Thumanës, efektivët e Policisë së Shtetit e kanë shpërndarë përmes dhunës duke hedhur gaz lotsjellës dhe ujë drejt tyre.
Në foton e mësipërme është momenti kur Policia ka hedhur gaz lotsjellës drejt protestuesve, ndërsa në videon e mëposhtme është momenti kur hiodhet ujë drejt protestuesve.
Banorët u përplasën me Policinë, pasi tentuan sërish të bllokonin autostradën Thumanë-Kashar, por e kishin të pamundur të çanin koordonin policor me qindra efektivë që kishin dalë në terren. Më pas disa prej protestuesve i vunë zjarrin disa shkurreve anës autostradës.
Banorët e Krujës, Fushë Krujës dhe Thumanës kërkojnë hyrje dhe dalje në autostradë, ose një rrugë dytësore, pasi me rrugën e re ata nuk kanë akses për banesat dhe bizneset e tyre dhe deklarojnë se po shkojnë drejt falimentimit. Sipas banorëve, ata duhet të shkojnë deri në Rinas për t’u futur në autostradë.
Edhe pse po protestojnë prej javësh, deri më tani ata nuk kanë marrë asnjë reagim nga Qeveria, por kjo e fundit dërgon qindra Policë për të shtypur protestën, madje shpesh herë edhe me dhunë dhe gaz lotsjellës.
Të pranishëm në protestën e sotme janë edhe deputetët Oerd Bylykbashi dhe Andia Ulliri si dhe aktivisti Adriatik Lapaj.
