Lojërat Olimpike të Parisit ulën siparin këtë të dielë me Shtetet e Bashkuara të Amerikës që rezultuan vendi më i suksesshëm ndërsa parakaluan në renditjen Kinën në momentin e fundit të garave.
Garat e Lojërave Olimpike u mbyllën me finalen e basketbollit të femrave mes SHBA dhe Francës. Ekipi i femrave të SHBA fitoi me rezultatin 67-66 duke marrë medaljen e artë.
Një medalje që i duhej për t’u konfirmuar e pakalueshme në këtë eveniment, për t’i siguruar SHBA-së vendin e parë në renditjen e përgjithshme për herë të katërt radhazi në Lojërat Olimpike.
Para kësaj ndeshje, ishte Kina që regjistronte 40 medalje të arta ndaj 39 të SHBA në Paris 2024. Por me fitoren e ekipit të femrave të basketbollit, SHBA barazoi Kinën për të arta, teksa mori kreun e klasifikimit falë 44 medaljeve të argjendta ndaj 27 që kanë siguruar aziatikët.
Kështu, SHBA dominon tabelën për të katërtin edicion radhazi të Lojërave Olimpike, duke ndaluar rikthimin e Kinës në majë për herë të parë që pas Pekin 2008.Në vendin e tretë është renditur Japonia me 20 medalje të arta, e ndjekur nga Australia me 18 dhe Franca me 16.
Ndërkohë, Shqipëria largohet nga Parisi me dy medalje të bronzta. Pas suksesit historik të Chermen Valiev, që theu tabunë shekullore 1 ditë më parë , Islam Dudaev rishkruajti historinë, duke i dhuruar Shqipërisë një tjetër medalje, e dyta në historinë e Shqipërisë.
Renditja e medaljeve:
Kujtojmë që Olimpiada nuk është mbyllur ende zyrtarisht teksa pas disa orësh pritet të organizohet ceremonia përmbyllëse.
Thomas Jolly është duke përgatitur shfaqjen përmbyllëse, me performanca të përfolura nga dy grupe të njohura franceze: fituesit e Grammy-t Phoenix dhe dyshja elektronike AIR, të cilët kanë qenë në turne këtë vit.
Yje të tjerë që përflitet se do të shfaqen janë Snoop Dogg dhe spekulimet janë se në këtë ceremoni, e pranishme do të jetë dhe Taylor Swift, Yje të tjerë që janë parë në Paris janë regjisorja e Barbie, Greta Gerwig, Michelle Yeoh, Ryan Gosling dhe Eva Mendes.
Gjithashtu është konfirmuar se Tom Cruise do të shfaqet gjatë ceremonisë së mbylljes.
