Mjeku kardiokirurg Edvin Prifti ka reaguar pasi në Bosnjë dhe Hercegovinë është kryer për herë të parë transplanti i zemrës, teksa ka shpërndarë në rrjetet sociale postimin e kolegut të tij Nermir Granov, i cili ka kryer operacionin.
Ndërhyrja është kryer në spitalin publik Cantonal Hospital Zenica, pasi familja e një 21-vjeçari që kishte pësuar vdekje të trurit ka pranuar të dhurojë organet.
Nisur nga ky rast, mjeku Edvin Prifti shprehet se në Shqipëria nuk ka ndërmarrë asnjë iniciativë konkrete për dhurimin e organeve të pacientëve që pësojnë vdekje klinike, si një mënyrë për të shpëtuar të tjerët që kanë nevojë për transplant të organeve.
Ai ngre pyetjen se deri kur do vazhdojmë të mbetemi të fundit në Europë, teksa sipas tij, Shqipëria është një vend ku zotëron dhe triumfon paaftësia dhe sipas tij, aftësia e vetme e të paaftëve është të vrasin të aftit.
“Deri kur do te vazhdojme te jemi te fundit ne Evrope? Bosnja kryen transplantin e pare te zemres nga prof. Granov. Ne Shqiperi mund ta kishim kryer dhjete vjet me pare, pasi kishim cdo element teknik dhe teknologjik. E kemi kerkuar me ngulm ministrise perkatese, por akoma sot e kesaj dite skemi ligjet e duhura pasi politika ska gjetur kohen e pershtatshme per kete. E kuptueshme apo jo?
E trishtueshme! Te paditurit dhe te pamendte! Shqiperia vendi ku paaftesia zoteron dhe triumfon dhe ku aftesia e vetme e te paafteve eshte te vrasin te aftit!
Ja tani mbetet vetem krenaria boshe e te paafteve “patriot”!
Gjithesesi urime dhe suksese kolegut dhe mikut tim Granov per kete arritje per vendin e tij dhe per rajonin!” – shkruan mjeku Edvin Prifti.
